بانكنوتتىڭ 25 قورعانىش ەلەمەنتى بار.
2022 جىلعى 1 قازاندا قازاقستان ۇلتتىق بانكى نومينالدىق قۇنى 20 000 تەڭگەلىك بانكنوتتى اينالىمعا شىعارادى، دەپ حابارلايدى Almaty-akshamy.kz.
«بانكنوت اينالىمداعى اقشا بەلگىلەرىمەن ءبىرىڭعاي ستيلدە جاسالعان. مىسالى، بەت جاعىندا كوبىنە تىگىنەن ورىندالعان بەينەلەر، سىرت جاعىندا كولدەنەڭ ورىندالعان بەينەلەر ورنالاسقان. ديزاينى نومينالدىڭ گولوگرافيالىق بەينەسى تىگىنەن ورنالاسقان مەتالسىزداندىرىلعان جولاقتى قولدانا وتىرىپ جاسالعان»،- دەلىنگەن ۇلتتىق بانكتىڭ باسپا ءسوز قىزمەتىنىڭ حابارلاماسىندا.
بانكنوتتىڭ 25 قورعانىش ەلەمەنتى بار، مولشەرى 155ح79 مم جانە سۇر تۇسكە باسىمدىق بەرىلگەن.
بەت جاعىندا قازاقستان رەسپۋبليكاسىنىڭ مەملەكەتتىك رامىزدەرى، «قازاق ەلى» مونۋمەنتى، «ماڭگىلىك ەل» سالتانات قاقپاسى، «باسقۇر» قازاق ۇلتتىق ويۋ-ورنەگىنىڭ فراگمەنتى جانە تاۋەلسىزدىك جىلدارىن بىلدىرەتىن «30» سانى بەينەلەنگەن.
بانكنوتتىڭ ەكىنشى بەتىندە استانانىڭ جانە اقوردا رەزيدەنسياسىنىڭ پانورامالىق كورىنىسىن كورۋگە بولادى.
نومينالى 20 000 تەڭگەلىك جاڭا ديزاينداعى بانكنوت ءوز قۇنىنا ساي قازاقستان رەسپۋبليكاسىنىڭ بۇكىل اۋماعىندا تولەمدەردىڭ بارلىق ءتۇرى بويىنشا قابىلداۋعا، سونداي-اق ەلدەگى بانكتەردە بانكتىك شوتتارعا ەسەپكە الۋعا جانە اۋدارۋعا، ۇساقتاۋعا، ايىرباستاۋعا جاتادى.
جاڭا كۋپيۋرا «قازاق ەلى» سەرياسىمەن ۇسىنىلعان قازىرگى تاڭدا اينالىمدا بار 500، 1 000، 2 000، 5 000 جانە 10 000 تەڭگەلىك نومينالداعى بانكنوتتاردىڭ قاتارىن تولىقتىرادى.