زاڭعا قۇرمەت – وركەنيەتتى قوعام ايناسى
بۇگىن قازاقستان پرەزيدەنتى قاسىم-جومارت توقايەۆ پارلامەنت پالاتالارىنىڭ بىرلەسكەن وتىرىسىندا ەل حالقىنا كەزەكتى جولداۋىن جاريالادى.
جولداۋدا ايتىلعان ماڭىزدى تۇستارعا قازاق ۇلتتىق قىزدار پەداگوگيكالىق ۋنيۆەرسيتەتىنىڭ پرورەكتورى،زاڭ عىلىمدارىنىڭ دوكتورى، پروفەسسور ەركىن شاجا ۇلى ءدۇسىپوۆ وي قوستى، - دەپ حابارلايدى Aqshamnews.kz ءتىلشىسى.
"پرەزيدەنت قاسىم-جومارت توقايەۆ قازاقستان حالقىنا ارناعان جولداۋىندا: "زاڭ جانە ءتارتىپ – مەملەكەتىمىزدىڭ مىزعىماس تۇعىرى" دەپ اتاپ ءوتتى. بۇل ءسوز – تاۋەلسىزدىكتى ساقتاپ قالۋدىڭ، ەلدىك بولمىسىمىزدى نىعايتۋدىڭ باستى قاعيداسى. شىن مانىندە، قۇقىق پەن ءتارتىپ بار جەردە ادىلەت سالتانات قۇرادى، قوعامنىڭ دامۋىنا سەنىمدى نەگىز قالانادى.
مەملەكەت باسشىسى كەز كەلگەن زاڭسىزدىققا مۇلدەم توزبەۋ قاعيداسىن ۇستانۋ قاجەتتىگىن اتاپ ءوتتى. بۇل تەك قۇزىرلى ورگانداردىڭ عانا ەمەس، بۇكىل قوعامنىڭ ورتاق مىندەتى. سەبەبى قۇقىقتىق مادەنيەت ءار ازاماتتىڭ كۇندەلىكتى ومىرلىك ۇستانىمىنان باستالادى.
زاڭعا قۇرمەت، ادىلدىككە سەنىم – وركەنيەتتى قوعامنىڭ كورسەتكىشى. دەگەنمەن، پرەزيدەنت اتاپ وتكەندەي، قوعامدىق ورىنداردا ورىنسىز داۋلاسۋ، بالاعات ءسوز ايتۋ، دورەكىلىك كورسەتۋ سىندى جاعىمسىز ارەكەتتەر ءالى دە كەزدەسىپ قالادى. بۇل – تەك ءتارتىپ بۇزۋ ەمەس، سونىمەن بىرگە ۇلتتىق مادەنيەتىمىزگە كولەڭكە تۇسىرەتىن، ەلدىڭ بەدەلىنە نۇقسان كەلتىرەتىن قۇبىلىس.
ۇلى ابايدىڭ «ءبىرىڭدى قازاق، ءبىرىڭ دوس، كورمەسەڭ ءىستىڭ ءبارى بوس» دەگەن وسيەتى ءدال بۇگىنگى قوعام ءۇشىن دە اسا وزەكتى.
قۇقىقتىق سانا – تاربيەدەن باستالادى
"زاڭ عىلىمدارىنىڭ وكىلى رەتىندە ايتارىم: قۇقىق بۇزۋشىلىققا قارسى سانا قالىپتاستىرۋ تەك جازالاۋ شاراسىمەن عانا شەكتەلمەيدى. ەڭ الدىمەن، ول – تاربيە مەن ءبىلىمنىڭ جەمىسى.
جاڭا قازاقستاننىڭ ازاماتى مەملەكەتشىل، وتانشىل، ادىلەتتى قوعام قۇرۋعا مۇددەلى بولۋى ءتيىس. قازاق ۇلتتىق قىزدار پەداگوگيكالىق ۋنيۆەرسيتەتىندە بولاشاق پەداگوگتەردى دايارلاۋدا ءبىز وسى قۇندىلىقتارعا ەرەكشە ءمان بەرەمىز. سەبەبى ۇستاز – قوعامعا ۇلگى، جاس ۇرپاقتىڭ بويىنا ءتارتىپ پەن مادەنيەتتى سىڭىرەتىن تۇلعا"، - دەيدى ە.ءدۇسىپوۆ.
پاتريوتيزم – تەك ءتىل مەن مادەنيەت ەمەس
"پرەزيدەنت اتاپ كورسەتكەندەي، بۇگىنگى پاتريوتيزم ۇعىمىنىڭ اۋقىمى كەڭەيىپ كەلەدى. ول تەك ءتىل مەن مادەنيەتكە قۇرمەتپەن شەكتەلمەيدى. زاڭعا باعىنۋ، ورتاق جاۋاپكەرشىلىك، ەل تىنىشتىعىن ساقتاۋ، ادىلدىككە ادال بولۋ – ءپاتريوتيزمنىڭ جاڭا قىرلارى.
قۇقىق ۇستەمدىگى – ادىلەتتى قازاقستاننىڭ باستى ىرگەتاسى. بۇل ىرگەتاس مىقتى بولسا، مەملەكەتىمىزدىڭ بولاشاعى دا بەرىك بولماق. سوندىقتان ءارقايسىمىز ەل تىنىشتىعىن ساقتاۋعا، زاڭ مەن ءتارتىپتى قادىرلەۋگە ۇلەس قوسۋىمىز قاجەت"، - دەپ تۇيىندەدى قازاق ۇلتتىق قىزدار پەداگوگيكالىق ۋنيۆەرسيتەتىنىڭ پرورەكتورى،زاڭ عىلىمدارىنىڭ دوكتورى، پروفەسسور ەركىن شاجا ۇلى ءدۇسىپوۆ