بىرەگەي تۇلعا دارىپتەلدى

نۇرتىلەۋ يمانعالي ۇلىنىڭ تۋعانىنا - 70 جىل

 الاشتىڭ ءبىرتۋار ازاماتى، جامپوز جۋرناليست نۇرتىلەۋ يمانعاليۇلىن بىلمەيتىن جان كەمدە-كەم. اقپارات سالاسىنىڭ قارا نارىنا اينالعان بىرەگەي تۇلعا كوزى تىرىسىندە ەل رۋحانياتىنا سۇبەلى ۇلەس قوسىپ، قازاق تەلەجۋرناليستيكاسىنىڭ قالىپتاسۋىنا بار قاجىر-قايراتىن جۇمسادى. تەرسىڭدى ەڭبەك، تەلەگەي تەر شۇمەكتەتىپ ەڭبەك ەتكەن ول مۇحيت باۋىرىنان مارجان سۇزگەندەي مىڭجىلدىقتاردان بەرگى قۇندىلىقتاردى جۋرناليستىك قارىمى مەن دارىنىنا ۇشتاستىرىپ، ۇلت پەرزەنتىنە اينالدى.
 
عاسىر قالىپتاستىرعان، جىلدار سومداعان تۇعىرلى تۇلعالار ساپىنان وسىلايشا ويىپ ورىن، تەۋىپ تۇعىر سايلاعان نۇرتىلەۋ يمانعالي ۇلىنىڭ تۋعانىنا 70 جىل تولۋىنا وراي «باي-قۋاتتى بولايىق!» كورمەسى ۇيىمداستىرىلدى. 
ارقا توسىندەگى اجارلى استانامىزدان باستاۋ العان يگىلىكتى شارانىڭ جالعاسى سەمەي، شىمكەنت، اتىراۋ، اقتاۋدا وتكەن بولاتىن. تالدىقورعان قالاسىنداعى م.تىنىشپايەۆ اتىنداعى تاريحي-ولكەتانۋ مۋزەيىندە جىل بويى وتكەن كورمەنىڭ قورىتىندىسى رەتىندە ۇيىمداستىرىلعان شارا شىمىلدىعىن جەتىسۋ وبلىسىنىڭ اكىمى بەيبىت يسابايەۆ قۇتتىقتاۋ سوزبەن اشتى. 

– نۇرتىلەۋ اعامىز جۋرناليستيكا سالاسىندا لايىقتى ورنى بار، وزىندىك سۇرلەۋ-سوقپاعىن قالىپتاستىرعان كانىگى مامان بولاتىن. ونىڭ ەسىمى ەل اراسىندا ايتىلسا بولدى، قالىڭ جۇرتشىلىق نۇرتىلەۋ يمانعالي ۇلىنىڭ ءوزى جۇرگىزگەن تەليەۆيزيالىق تۋىندىلارىن «باي-قۋاتتى بولايىق!» دەپ اياقتايتىنىن بىردەن ەسكە الىپ جاتادى. وعان دا نەگىز بار. سەبەبى،  ءبولمىس-بىتىمى وسى ۇعىممەن ابدەن استاسىپ تۇراتىنداي ەدى. «بەتپە-بەت»، «قولتاڭبا»، «دىڭگەك»، «كورشىلەر»، «زاڭ سويلەسىن»، «Nur-Tiley» سەكىلدى اۆتورلىق حابارلارى كورەرمەننىڭ ۇزبەي كورەتىن باعدارلامالارىنا اينالدى. سول ارقىلى حالىقتىڭ سۇيىسپەنشىلىگىنە بولەنىپ، العىسىن ارقالادى. ءومىرىنىڭ سوڭىنا دەيىن قازاق تەليەۆيزياسىنىڭ تۇتاس ءبىر بۋىنىن تاربيەلەپ، جۋرناليستيكانىڭ دامۋىنا ولشەۋسىز ۇلەس قوستى دەسەم، ارتىق ايتقاندىق ەمەس، – دەگەن ايماق باسشىسى ءوز كەزەگىندە ارىپتەس بولىپ قىزمەت ەتكەن جىلدارداعى ەستەلىكتەرىمەن ءبولىستى.  

جامپوز ءجۋرناليستىڭ ادامگەرشىلىك قاسيەتىن، پاراساتى مەن بيىك ۇستانىمىن اڭگىمەگە ارقاۋ ەتتى. سونىمەن قاتار، نۇرتىلەۋ يمانعالي ۇلىنىڭ زايىبى قارلىعاش سوۆەتبەك قىزى مەن كورمەنى ۇيىمداستىرۋعا اتسالىسقان ق ر ەڭبەك سىڭىرگەن قايراتكەرى امانتاي بەرعالييەۆكە العىس حات تابىس ەتىپ، يىعىنا زەرلى شاپان جاپتى.

ءوز كەزەگىندە ءسوز العان اتىراۋ وبلىسىنىڭ قۇرمەتتى ازاماتى امانتاي بەرعالييەۆ، تۇلعانىڭ زايىبى قارلىعاش سوۆەتبەك قىزى، «جەتىسۋ» تەلەارناسىنىڭ ديرەكتورى سەرىك سارىبايەۆ، مەملەكەت جانە قوعام قايراتكەرى، «قابانباي باتىر» قورىنىڭ ءتوراعاسى كامال ابدراحمانوۆتار ءسوز سويلەپ، بىرەگەي تۇلعانىڭ عيبراتتى عۇمىرىنان سىر شەرتتى. ال جەتىسۋلىق اقىن زيراگۇل نۇردانبەك قىزى كەمەل ويلى جۋرناليستكە ارناعان ولەڭىن وقىدى. 

جەتىسۋ وبلىسىنىڭ مادەنيەت، مۇراعاتتار جانە قۇجاتتاما باسقارماسىنىڭ قولداۋىمەن جانە م. تىنىشپايەۆ اتىنداعى تاريحي-ولكەتانۋ مۇراجايىنىڭ باستاماسىمەن وتكەن بۇل كوشپەلى كورمەگە بارلىعى 200 ەكسپونات قويىلعان. نۇرتىلەۋ يمانعالي ۇلىنىڭ كوزى تىرىسىندە پايدالانعان جەكە زاتتارى، جۇمىس قۇرالدارى، سپورتتا جەتكەن جەتىستىكتەرى، قىزمەتتىك كۋالىكتەرى، كىتاپ، ساعاتتارى سىندى جەكە زاتتارى كورەرمەن نازارىنا ۇسىنىلدى. 

ايتا كەتسەك، اتالمىش كورمەنى قالا تۇرعىندارى مەن قوناقتارى 7–30 جەلتوقسان ارالىعىندا تاماشالاي الادى. سونىمەن قاتار، تۇلعانىڭ ەسىمىن تۋعان جەرىندە ماڭگىلىك قالدىرۋ ماقساتىندا كەلەسى جىلدان باستاپ يگىلىكتى ىستەر قولعا الىنباق. الدىمەن مايتالمان ءجۋرناليستىڭ ءومىرى مەن شىعارماشىلىعى تۋرالى تولىمدى كىتاپ جوسپاردا تۇر.