الماتى جولدارىندا ءبىر تاۋلىكتە 10 ماس جۇرگىزۋشى انىقتالدى، – دەپ حابارلايدى اlmaty-akshamy.kz.
بۇعان دەيىن حابارلاعانداي، قۇقىق بۇزۋشىلىققا مۇلدەم توزبەۋشىلىك قاعيداتىن نىعايتۋ، كوشەلەردە جانە باسقا دا قوعامدىق ورىنداردا ءتيىستى قوعامدىق ءتارتىپتى ساقتاۋ ماقساتىندا 20-30 قاراشا ارالىعىندا قالادا “قۇقىقتىق ءتارتىپ” جالپىرەسپۋبليكالىق جەدەل الدىن الۋ ءىس-شاراسى وتكىزىلىپ جاتىر. ول ۆانداليزم دەرەكتەرىن، مۇلىكتىك زالال كەلتىرۋدى، ۇساق بۇزاقىلىقتى، جول قوزعالىسى قاۋىپسىزدىگى سالاسىنداعى بۇزۋشىلىقتاردى انىقتاۋ جانە جولىن كەسۋگە، سونداي-اق تۇرمىستىق زورلىق-زومبىلىق، ونىڭ ىشىندە كامەلەتكە تولماعاندارعا قاتىستى قۇقىق بۇزۋشىلىقتاردىڭ الدىن الۋعا باعىتتالعان.
– “بۋران-315” پاترۋلدىك ەكيپاجىمەن رىسقۇلوۆ داڭعىلىنىڭ بويىندا Mazda كولىگى توقتاتىلدى، ونىڭ جۇرگىزۋشىسى كولىكتى اگرەسسيۆتى تۇردە تىزگىندەپ، وزىنە نازار اۋدارتتى. ونىڭ ىشىمدىك ىشكەنى بەلگىلى بولدى، ونى مەديسينالىق ساراپتاما راستادى. ت.ەسىمدى ازامات كولىك قۇرالىن باسقارۋدان شەتتەتىلدى جانە ق ر اقبتك-نىڭ 608-بابى 1-بولىگىمەن جاۋاپكەرشىلىككە تارتىلدى. سوت قاۋلىسىمەن ول 7 جىلعا كولىك قۇرالىن باسقارۋ قۇقىعىنان ايىرىلىپ، 15 تاۋلىككە اكىمشىلىك قاماققا الىندى. وسى ۋاقىتتا “بۋران-304” پاترۋلدىك جاساعى جانسۇگىروۆ كوشەسىنىڭ بويىندا Honda اۆتوكولىگىن توقتاتتى. ونىڭ جۇرگىزۋشىسى وسى جىلدىڭ قىركۇيەك ايىندا قارسى جولعا شىققانى ءۇشىن كولىك جۇرگىزۋ قۇقىعىنان ايىرىلعان. 1996 جىلى تۋعان ك.ەسىمدى ازامات ق ر اقبتك-نىڭ 612-بابى 3-بولىگى بويىنشا جاۋاپكەرشىلىككە تارتىلدى، – دەدى تۇركسىب اۋداندىق پوليسيا باسقارماسىنىڭ باستىعى ەركىن امانتايەۆ.
ەكى كولىك تە مامانداندىرىلعان ايىپپۇل تۇراعىنا ورنالاستىرىلدى.