كۇن جىلىنىپ، توڭىرەك تۇگەل جاسىل كويلەگىن كيىنىپ، ورىك، الما اعاشتارى گۇل اتقاندا ءسىزدى تاڭعى ۇيقىدان قۇستاردىڭ سازدى ءانى وياتادى. سيقىر ءۇن جۇرەك ساندىعىن اقتارىپ، كوڭىلىڭىزدىڭ تەرەزەسىن ساعىنىش سازىن قاعىپ، سان قۇبىلتىپ سالعان قۇستار ءانى سۇيسىندىرمەي قويمايدى. «اق تىرنالار اسپاندى بوزداتادى. سۇقسىر كوكەك توعايدان سۇڭقىلداسا، قاي-قايداعى مۇڭىمدى قوزعاتادى»، – دەپ اقىن مۇقاعالي ماقاتايەۆ جىرلاعانداي، جىل مەزگىلىنىڭ عاجابى – كوكتەمنىڭ قاناتىنا ىلەسە، جىل قۇستارى كەرۋەن كوشىن باستاپ،جىلى جاقتان قايتا ورالۋدا
«كوك قۇراق – كولدىڭ ساۋلەتى، قۇس پەن اڭ – ەلدىڭ داۋلەتى» دەيدى دانا حالقىمىز. وسى ورايدا، الماتى قالاسىندا ءوتىپ جاتقان «الماتى- ءبىزدىڭ ورتاق ءۇي»اتتى اكسياعا جەتىسۋ اۋدانى №108 جالپى ءبىلىم بەرەتىن مەكتەپ وقۋشىلارى دا بەلسەنە قاتىسىپ، ءوز قيالدارىنا ەرىك بەرىپ، ءتۇرلى ۇياشىقتار جاساپ جارىسۋدا. مۇنداي ءىس-شارالار ءاربىر وقۋشىنىڭ جۇرەگىنە قامقورلىق سەزىمىن وياتىپ قانا قويماي، تىلسىم تابيعاتتىڭ كوركىن اشاتىن قۇستاردىڭ قاسيەتىن بويلارىنا دارىتۋدا. وسىنداي ۇيىمداستىرىلعان ءىس-شارالار ارقىلى جاسوسپىرىمدەرگە ۇزدىكسىز ەكولوگيالىق ءبىلىم مەن تاربيە بەرىپ وتىرساق، دەنىمىز ساۋ، بولاشاعىمىز جارقىن بولارى حاق.