ونىڭ ىشىندە تورتەۋى – بالالار
بۇل تۋرالى تجم باسپا ءسوز قىزمەتى حابارلادى، دەپ جازادى Almaty-akshamy.kz. 8 ناۋرىزدا سەمەيدە ءتورت بالا گازدان ۋلانىپ قالدى.
اقپاراتقا سايكەس، جەكە تۇرعىن ۇيدە قاتتى وتىنمەن جىلىتۋ پەشىن پايدالانۋ ەرەجەلەرى بۇزىلعاندىعى انىقتالدى. 4 جانە 5 جاستاعى ەكى بالا دارىگەرلەردىڭ تەكسەرىسىنەن سوڭ ۇيلەرىنە قايتارىلعان.
ال، 11 جانە 7 جاستاعى بالالار ۋلى گازدان ورتاشا دارەجەدە ۋلانىپ، قالاداعى "بۇيرەك ورتالىعى" مەكەمەسىنە توكسيكولوگيا بولىمشەسىنە جاتقىزىلدى.
تجم مالىمەتىنشە، ۋلانۋ دەرەگى سقو-دا دا تىركەلدى.
"سولتۇستىك قازاقستان وبلىسىندا 8 ناۋرىز كۇنى ساعات 02:52-دە ع.مۇسىرەپوۆ اتىنداعى اۋداننىڭ ورتالىق اۋرۋحاناسىنا نوۆويشيمسكوە اۋىلىنداعى كوپ پاتەرلى تۇرعىن ۇيدەگى جالدامالى پاتەردە تۇراتىن 1976 جىلى تۋعان ايەل مەن 1977 جىلى تۋعان ەر ادام جاتقىزىلدى. بۇگىندە ولار اۋرۋحانادان ۇيلەرىنە شىعارىلدى. پاتەردى تەكسەرۋ كەزىندە جىلىتۋ پەشىنىڭ مۇرجاسى كۇيەگە تولى ەكەندىگى انىقتالدى. پەش دۇرىس تارتپاعاندىقتان، ۋلى گاز بولمەگە تارالعان. بۇدان باسقا پەش پەن مۇرجادا جارىقتار بولعان"، - دەلىنگەن حابارلامادا.
بۇل دەرەك بويىنشا تۇرعىن ءۇي يەسى ايىپپۇل سانكسيالارىن كوزدەيتىن ق ر اقبتك-نىڭ 410-بابى 3-بولىگى بويىنشا اكىمشىلىك جاۋاپكەرشىلىككە تارتىلدى.