ءبىر جىلدا ءۇش رەت ادامداردى قۇتقارىپ، ەرلىك جاساعان پاترۋل ماراپاتتالدى

جەكە قۇراممەن كەزدەسۋدە پوليسيا دەپارتامەنتىنىڭ باسشىسى قالاداعى كريمينوگەندىك جاعدايعا توقتالىپ، جالپى 10 ايدىڭ جۇمىس قورىتىندىسىن ءبولىستى.

– قىلمىستىڭ تىركەلۋى 9،6%-عا وسكەنى بايقالادى. بۇل وبەكتيۆتى سەبەپتەرگە جانە ەڭ الدىمەن الەۋمەتتىك-ەكونوميكالىق جاعدايلارعا بايلانىستى. ءوسىم نەگىزىنەن مۇلىكتىك جانە تۇرمىستاعى قىلمىستارعا بايلانىستى. سونىمەن بىرگە بيىل كىسى ءولتىرۋ، زورلاۋ، توناۋ، قاراقشىلىق جانە بۇزاقىلىق سىندى قىلمىستاردىڭ سانى تومەندەدى، – دەدى استانا قالاسى پد باستىعى مارات تولەبايەۆ.

مينيستر قىزمەت جەتەكشىلەرىنە، ۋچاسكەلىك جانە پاترۋلدىك پوليسيا ينسپەكتورلارىنا قويىلاتىن تالاپتاردى ەسكە سالىپ، قوعامدىق ءتارتىپتى ساقتاۋدا ازاماتتاردىڭ كونستيتۋسيالىق قۇقىقتارى مەن زاڭدىلىقتىڭ تولىقتاي ساقتالۋىن قاداعالاۋدى تاپسىردى.

سونداي-اق ءبىرقاتار پروبلەمالىق ماسەلەلەرگە نازار اۋداردى.

– وزگەرىستەر ءبىرىنشى باسشىدان بولۋى كەرەك. باسشىنىڭ كوزقاراسى، جۇمىس ءستيلى وزگەرۋى كەرەك. ءبىرىنشى تالاپ كورسەتكىش ەمەس، تىركەلگەن قىلمىستىڭ سانى ءوستى دەپ سىزدەرگە ەشقانداي تالاپ قويىپ جاتقان جوقپىن. وبەكتيۆتى تۇردە كورسەتۋ كەرەك ونى. جاسىرماۋىمىز كەرەك جاعدايدى. ءبىز ايتامىز عوي، پروبلەما شەشۋگە باعىتتالعان تاسىلدەر دەپ، دەمەك پروبلەما بار، ونى انىقتاپ، كورسەتىپ، ونىڭ نەگىزگى كوزىن جويۋ ءۇشىن جۇمىلىپ جۇمىس ىستەۋىمىز كەرەك. ارينە، بۇل استانا، مۇندا ادام سانى ءوسىپ جاتىر، تىركەلمەگەن قانشاما ازاماتتار بار. ەگەر قىلمىستىڭ شىعۋ سەبەبىن ءبىلىپ وتىرساڭىزدار، سوعان شارا قولدانۋ كەرەك. ولشەمدەردىڭ وزگەرۋى دەگەن وسى، – دەدى ىشكى ىستەر ءمينيسترى.

استانا قالاسىنىڭ وزگە وڭىرلەرگە ۇلگى بولۋى كەرەكتىگىن العا تارتقان ۆەدومستۆو باسشىسى جيىندا قىزمەتىمەن كوزگە تۇسكەن 12 قىزمەتكەردى گراموتا، توسبەلگى، مەدالمەن ماراپاتتادى.

اتاپ ءوتۋ كەرەك، ماراپاتتالعانداردىڭ اراسىندا كوپىردەن سەكىرگەن ەر ادامدى قۇتقارعان پاترۋلدىك پوليسيا قىزمەتكەرلەرى سامات ءسابيت، ساكەن تاسقىن مەن رينات مۇحامەدجانوۆ تا بار.

ولارعا «قۇقىق ءتارتىبىن قامتاماسىز ەتۋگە قوسقان ۇلەسى ءۇشىن» مەدالى تابىستالدى.