يوردانيا استاناسى اممان قالاسىندا بوكستان ءوتىپ جاتقان ازيا چەمپيوناتىندا بۇگىن ەرلەر اراسىندا 9 قازاقستاندىق التىن جۇلدەگە تالاسادى، دەپ حابارلايدى Almaty-akshamy.kz Inform.kz-كە سىلتەمە جاساپ.
استانا ۋاقىتىمەن ساعات 16.00-دە باستالاتىن قۇرلىقتىق دودادا ءتورت قازاقستاندىق بوكسشى فينالدا بىرىنەن كەيىن ءبىرى شىعادى.
الدىمەن جاستار اراسىنداعى الەم چەمپيونى سانجار تاشكەنباي (48 كگ) جاپونيالىق اراتاكە كادزۋمامەن مىقتىنى انىقتايدى.
بۇدان كەيىن توكيو وليمپياداسىنىڭ قولا جۇلدەگەرى، الەم چەمپيونى ساكەن بيبوسىنوۆقا (51 كگ) كەزەك تيمەك. ول وزبەكستاندىقتار ۇلكەن ءۇمىت ارتىپ وتىرعان وليمپيادا چەمپيونى حاسانبوي دۋسماتوۆپەن التىندى ساراپقا سالادى. 2021 جىلى بەلگرادتا وتكەن الەم چەمپيوناتىندا ح.دۋسماتوۆتىڭ ساكەننەن جەڭىلىپ قالعانى بەلگىلى. ەندى سونىڭ ەسەسىن قايتارۋعا ۇمتىلاتىنى انىق.
الەم چەمپيوناتىنىڭ كۇمىس جۇلدەگەرى ماحمۋد سابىرحان (54 كگ) توكيو وليمپياداسىنىڭ ءفيناليسى، فيليپپيندىك كارلو پاالامعا قارسى تۇرماق.
الەم چەمپيوناتىنىڭ كۇمىس جۇلدەگەرلەرى، قازاقستاندىق سەرىك تەمىرجانوۆ (57 كگ) پەن وزبەكستاندىق ابدۋماليك حالوكوۆتىڭ جەكپە-جەگى دە قىزۋ وتەتىنى انىق.
سونداي-اق جەتىنشى جۇپتا دۋلات بەكباۋوۆ (67 كگ) تايلاندتىق بۋندجونگ سينسيريمەن، ۇلتتىق قۇراما كاپيتانى، ازيا ويىندارىنىڭ كۇمىس جۇلدەگەرى اسلانبەك شىمبەرگەنوۆ (71 كگ) يوردانيالىق زەياد يشايشپەن، نۇرقانات رايىس (75 كگ) وزبەكستاندىق سايدجامشيد دجافاروۆپەن قولعاپ تۇيىستىرەدى.
جاسوسپىرىمدەر وليمپياداسىنىڭ چەمپيونى، جاستار اراسىندا الەم چەمپيوناتىنىڭ كۇمىس جۇلدەگەرى ايبەك ورالبايدىڭ (92 كگ) 12-جۇپتا وزبەكستاندىق قازاق، 2021 جىلعى دۇنيەجۇزىلىك دودادا قولا العان ماديار سايدراحيموۆپەن كەزدەسۋى ەل نازارىن اۋداراتىنى انىق.
بوكس كەشىن اسا اۋىر سالماقتا توكيو وليمپياداسىنىڭ قولا، الەم چەمپيوناتىنىڭ ەكى مارتە كۇمىس جۇلدەگەرى قامشىبەك قوڭقابايەۆ تۇيىندەيدى. ونىڭ قارسىلاسى – تاعى ءبىر وزبەكستاندىق لازيزبەك مۋللاجونوۆ.
فينالعا قازاقستاننان 9، وزبەكستاننان 7 بوكسشى شىقسا، سولاردىڭ بەسەۋى ءوزارا جۇدىرىقتاسادى.
سونداي-اق يوردانيادان 4، تايلاندتان 2، ءۇندىستان، جاپونيا، فيليپپين مەن موڭعوليادان بىر-بىردەن سپورتشى التىن ءۇشىن سايىسقا تۇسەدى.