ءبىر جىلدا ەكى سىنىپ: ۆۋندەركيند بالالارعا قانداي مۇمكىندىك بار؟

ءار بالا وزىنشە ەرەكشە، ءبىراق كەيبىر بالالار قاتارلاستارىنان وزىق شىعىپ، مەكتەپ باعدارلاماسىن ەرتە مەڭگەرىپ الادى. ەگەر بالاڭىز ۆۋندەركيند بولسا، ونى كەلەسى سىنىپقا اۋىستىرۋدىڭ زاڭدى جولدارى بار. اqshamnews.kz بۇل ماسەلەنى تەرەڭىرەك زەرتتەپ، ماڭىزدى مالىمەتتەردى ۇسىنادى.

قازاقستاندا كىمدەر كەلەسى سىنىپقا كوشە الادى؟

ەگەر بالا قابىلەتتى بولسا، ول كەلەسى سىنىپقا كوشە الادى. بۇل پروسەسس قازاقستاندا ەكستەرنات نىسانىندا وقۋ ارقىلى جۇزەگە اسادى. ول ق ر ءبىلىم جانە عىلىم مينيسترلىگىنىڭ 2016 جىلعى 22 قاڭتارداعى №61 بۇيرىعى نەگىزىندە رەتتەلگەن.

وقۋ-اعارتۋ مينيسترلىگىنىڭ مالىمەتىنشە، قولدانىستاعى نورماتيۆتىك-قۇقىقتىق اكتىلەردىڭ نورمالارىنا سايكەس ەكستەرنات نىسانىندا وقۋعا 5-سىنىپتان باستاپ 11-سىنىپقا دەيىن رۇقسات بەرىلەدى.

ەكستەرناتقا كىمدەر رۇقسات الا الادى؟

ەكستەرنات نىسانىندا وقۋعا مىنا جاعدايلاردا رۇقسات بەرىلەدى:

• دەنساۋلىعىنا بايلانىستى: ەگەر بالا مەكتەپكە تۇراقتى بارا الماسا جانە دارىگەرلىك-كونسۋلتاتيۆ كوميسسيانىڭ قورىتىندىسى بولسا؛

• شەتەلدە ۋاقىتشا تۇرۋ: اتا-انالارىمەن بىرگە شەتەلدە جۇرگەن جاعدايدا؛

• ۇزدىك وقۋشىلار: بارلىق پاننەن ۇزدىك وقىپ، "4" جانە "5" باعالارىن العان جاعدايدا.

ءبىر جىلدا ەكى سىنىپتىڭ باعدارلاماسى قالاي وقىتىلادى؟

وقۋشى بىردەن سىنىپ اتتاپ كەتپەيدى، ول ءبىر وقۋ جىلىندا ەكى سىنىپتىڭ باعدارلاماسىن مەڭگەرەدى.

"قاعيدالاردىڭ تالاپتارىنا سايكەس، ءبىلىم الۋشى ءبىر وقۋ جىلىندا ەكى سىنىپتىڭ وقۋ باعدارلامالارىن مەڭگەرەدى. اعىمدىق، قورىتىندى اتتەستاتتاۋ نىسانى مەن مەرزىمدەرىن ءبىلىم بەرۋ ۇيىمىنىڭ باسشىسى دەربەس بەلگىلەيدى"، – دەدى مينيسترلىك وكىلدەرى.

وقۋشىنىڭ اتا-اناسى Egov ارقىلى ءوتىنىش بەرگەننەن كەيىن ول مەكتەپتىڭ بازاسىنا تۇسەدى. سودان كەيىن كوميسسيا قۇرىلادى. مىسالى، 5-سىنىپتى وقىپ ءجۇرىپ، 6-سىنىپتى اتتاپ، بىردەن 7-سىنىپقا كوشكىسى كەلسە، ول 5-سىنىپتىڭ دا، 6-سىنىپتىڭ دا باعدارلامالارىن تولىق مەڭگەرۋگە ءتيىس. بالانىڭ كۇندەلىكتى ساباعىنا قاتىسۋى جالعاسادى، ال كەلەسى سىنىپتىڭ تاپسىرمالارىنا ۇيدەن دايىندالادى. وعان ارنايى ءمۇعالىم بولىنبەيدى، ءبىراق كەيدە ساباق ۇستىندە كەلەسى سىنىپتىڭ ەسەپتەرى بەرىلۋى مۇمكىن. كەيىن كوميسسيا بجب، تجب ناتيجەلەرىن تەكسەرىپ، قورىتىندى تەستىلەۋ جۇرگىزەدى. ەگەر بالا بارلىق تالاپتى ورىنداسا، سىنىپ اتتاپ كەتۋگە مۇمكىندىك الادى.

قانداي قۇجاتتار كەرەك؟

ەكستەرناتقا ءوتىنىش بەرۋ ءۇشىن اتا-انا Egov پورتالى ارقىلى ەلەكترون تۇردە جۇگىنەدى. نەگىزگى قۇجاتتار ءتىزىمى:

• ەلەكترون ءوتىنىش (سەق ارقىلى)؛

• دەنساۋلىعىنا بايلانىستى بولسا – دارىگەر قورىتىندىسى (026/ە نىسانى)؛

• ۇلگەرىم تابەلى ("4" جانە "5" باعالارى بولۋى شارت)؛

• شەتەلدە ۋاقىتشا تۇرۋىن راستايتىن انىقتاما؛

• شەتەلدە وقيتىندىعىن راستايتىن قۇجات (ەگەر اتا-اناسىز تۇرىپ جاتسا).

قانشا بالا ەكستەرناتتا وقىپ ءجۇر؟

ۇلتتىق ءبىلىم بەرۋ دەرەكتەر قورىنىڭ مالىمەتىنشە، 2024 جىلى قازاقستان بويىنشا بار-جوعى 46 وقۋشى ەكستەرنات نىسانىندا ءبىلىم العان. بۇل جۇيە – ەرەكشە قابىلەتتى بالالارعا ءوز مۇمكىندىكتەرىن تولىق اشۋعا مۇمكىندىك بەرەتىن سيرەك جولداردىڭ ءبىرى.

ءبىر وقۋ جىلىندا ەكى سىنىپتى اتتاپ كەتۋ رەسمي تۇرعىدا مۇمكىن، ءبىراق ول ۇلكەن ەڭبەك پەن جاۋاپكەرشىلىكتى تالاپ ەتەدى. بالا كۇندەلىكتى وقۋىن جالعاستىرىپ قانا قويماي، قوسىمشا كەلەسى سىنىپتىڭ تاپسىرمالارىن دا يگەرۋگە ءتيىس. سوندىقتان مۇنداي شەشىمدى اتا-انا، ءمۇعالىم جانە پسيحولوگ بىرلەسىپ قابىلداعانى ءجون.