تۇركيادان باسپانا الۋشى وتانداستارىمىزدىڭ قاراسى كوبەيگەن
2021 جىلدىڭ جازىندا قازاقستاندىقتار تۇركيادا 507 پاتەر ساتىپ الىپ، شەتەلدىك تۇتىنۋشىلاردىڭ بەلسەندى وندىعىنا ەندى، دەپ حابارلايدى Almaty-akshamy.kz.
Egemen.kz باسىلىمىنىڭ حابارلاۋىنشا، بۇل دەرەكتى Turk.Estate جىلجىمايتىن مۇلىك اگرەگاتورى كەلتىرگەن.
قازاقستان بۇل تىزىمدە 6 ورىنعا تۇراقتاعان. ءبىزدىڭ ەلدەن كەيىن تۇركيادان جىلجىمايتىن مۇلىك ساتىپ الۋعا سۇرانىس گەرمانيا، كۋۆەيت مەملەكەتتەرىندە جوعارى ەكەندىگى انىقتالدى.
قازاقستاندىقتار 2021 جىلدىڭ قاڭتارىنان تامىز ايىن قوسا العاندا تۇركيادا 1112 پاتەر ساتىپ العان. بۇل كورسەتكىش بىلتىرعى جىلعى دەرەكتەرمەن شامالاس. ەل تۇرعىندارى 2020 جىلى تۇركيادان 1171 پاتەر ساتىپ العان.
تۇركيادان پاتەر الۋعا قىزىعۋشىلىق، اسىرەسە، جاز ايلارىندا ارتقانىن مىنا دەرەكتەردەن اڭعارۋعا بولادى: قاڭتار (69 پاتەر)، اقپان (119)، ناۋرىز (166)، ءساۋىر (188)، مامىر (80)، ماۋسىم (165)، شىلدە (166) جانە تامىز (176).
يراك 2021 جىلى تۇرىك جىلجىمايتىن مۇلىگىن ساتىپ الۋ بويىنشا شەتەلدىكتەر اراسىندا ءبىرىنشى ورىندا. بۇل ەلدىڭ تۇرعىندارى 4631 پاتەر ساتىپ العان.
تۇركيا ستاتيستيكا ينستيتۋتىنىڭ 2021 جىلدىڭ ءساۋىر ايىنداعى مالىمەتىنە سۇيەنسەك، قازاقستاندىقتار شەتەلدىكتەر اراسىندا تۇرىك جىلجىمايتىن مۇلىگىن ساتىپ الۋ سانى بويىنشا توعىزىنشى ورىندا.