يران سوتى بلوگەر حۋسەين شانبەحزادەگە 12 جىلعا باس بوستاندىعىنان ايىرۋ جازاسىن تاعايىندادى. بلوگەر ماۋسىم ايىندا جوعارعى كوشباسشى ءالي حامەنەيدىڭ تۆيتىنە جاۋاپ رەتىندە ءبىر عانا نۇكتە قويعانى ءۇشىن تۇتقىندالعان، دەپ حابارلايدى aqshamnews.kz iranintl.com سايتىنا سىلتەمە جاساپ.
شانبەحزادە مامىر ايىندا جازباعا نۇكتە قالدىرىپ، ەش زيانسىز كورىنەتىن ارەكەت جاسادى. الايدا بىرنەشە اپتادان كەيىن ونىڭ پىكىرىنە حامەنەيدىڭ باستاپقى تۆيتىنەن كوپ لايك جينالىپ، بيلىكتىڭ نازارىن اۋدارتتى. ول ءبىراز ۋاقىتتان كەيىن ۇستالىپ، شىلدە ايىندا ۋاقىتشا قاماۋ مەرزىمى تاعى ءبىر ايعا ۇزارتىلدى.
31 تامىزدا ادۆوكاتى بلوگەرگە جالعان ايىپتار تاعىلىپ، 12 جىلعا سوتتالعانىن مالىمدەدى. بۇل ايىپتار يران سوتى تاراپىنان بەلسەندىلەردى ۇزاق ۋاقىت بويى قاماۋدا ۇستاۋ ءۇشىن جانە وزگەلەردى قورقىتۋ ماقساتىندا ءجيى قولدانىلاتىن ايىپتار.
بلوگەرگە «ءيزرايلدى قولداعان ناسيحات ارەكەتى» ءۇشىن بەس جىل، «يسلامدىق قاسيەتتى ورىنداردى قورلاعانى» ءۇشىن ءتورت جىل، «الەۋمەتتىك جەلىلەردە جالعان اقپارات تاراتقانى» ءۇشىن ەكى جىل جانە «رەجيمگە قارسى ناسيحات جۇرگىزگەنى» ءۇشىن ءبىر جىل جازا تاعايىندالدى، دەپ حابارلادى ونىڭ ادۆوكاتى ءامىر رايسيان.
رايسياننىڭ ايتۋىنشا، سوت «ءيزرايلدى قولداعان ناسيحات ارەكەتىنە» قاتىستى دالەل كەلتىرمەگەن. بۇل ايىپتار بلوگەردىڭ جەكە حات-حابارلارىنا نەگىزدەلگەن.
ادۆوكات بلوگەردىڭ باسقا ايىپتارى ونىڭ ساياسي تۇتقىنداردى قولداعانى، ەلدەگى جاعدايدى سىنعا العانى جانە مىندەتتى حيدجابتى الىپ تاستاۋعا قولداۋ بىلدىرگەنى ءۇشىن تاعىلعانىن ايتتى.