ەلىمىزدە 2-6 قىركۇيەك ارالىعىندا اتەروسكلەروز اپتالىعى ءوتىپ جاتىر. ونىڭ شەڭبەرىندە وڭىرلەردە اتەروسكلەروزعا بايلانىستى حاباردارلىقتى ارتتىرۋعا، سونداي-اق وسى اۋرۋدى ەمدەۋدىڭ الدىن الۋ شارالارى مەن ەمدەۋدىڭ زاماناۋي تاسىلدەرىن ىلگەرىلەتۋگە باعىتتالعان ءىس-شارالار ۇيىمداستىرىلۋدا، دەپ حابارلايدى aqshamnews.kz
ءبىز سالاۋاتتى ءومىر سالتىنىڭ جۇرەك پەن قان تامىرلارى ءۇشىن ماڭىزدىلىعى تۋرالى ءجيى ەستيمىز، ءبىراق ولاردىڭ ساۋلىعى ءبىزدىڭ بولاشاعىمىزعا قالاي اسەر ەتەتىنى تۋرالى ويلانامىز با؟ قازاقستاندا جۇرەك-قان تامىرلارى اۋرۋلارى ءولىم سەبەپتەرى اراسىندا ءبىرىنشى ورىندا تۇر، بارلىق ءولىمنىڭ 47%-ى ينسۋلت پەن ينفاركتقا بايلانىستى.
سوندىقتان جۇرەك پەن قان تامىرلارىنىڭ ساۋلىعى ۇزاق جانە بەلسەندى ءومىر ءسۇرۋدىڭ كەپىلى بولىپ تابىلادى. ەگەر ءسىز قاۋىپتەر تۋرالى بىلسەڭىز جانە ۋاقىتىلى ارەكەت ەتسەڭىز، وسى اۋرۋلاردىڭ كوپشىلىگىنىڭ الدىن الۋعا بولادى. وسى تاقىرىپتا الماتىداعى كارديولوگيا جانە ىشكى اۋرۋلار عزي كارديولوگيا بولىمشەسىنىڭ كارديولوگ دارىگەرى ۆيتاليي پاۆلوۆپەن سويلەسكەن ەدىك.
دارىگەردىڭ ايتۋىنشا، اتەروسكلەروز – بۇل ارتەريالاردىڭ ىشىندەگى بۇرتىك تۇيىندەردىڭ جينالۋى. حولەستەرين، مايلاردان جانە باسقا زاتتاردان تۇراتىن بۇل تۇيىندەر ارتەريالاردى تارىلتىپ، قان اعىمىن شەكتەپ، ميوكارد ينفاركتى مەن ينسۋلت سياقتى كۇردەلى پروبلەمالاردى تۋدىرۋى مۇمكىن.
كوبىنەسە اۋرۋ كوپتەگەن جىلدار بويى ەشقانداي بەلگىلەرسىز، ارتەريالاردىڭ قاتتى تارىلۋىنا اكەلەدى. بۇل كەزەڭدە جۇرەككە نەمەسە ميعا جۇكتەمەنىڭ شامالى ارتۋى دا اۋىر سالدارعا اكەلۋى مۇمكىن.
«اتەروسكلەروزدى كىم جانە قاشان تەكسەرۋ كەرەك؟ 20 جاستان باستاپ ءليپيدتى پروفيلگە قان ءاناليزىن تاپسىرۋدى جانە اۋىتقۋلار بولعان جاعدايدا كارديولوگپەن كەڭەسۋدى ۇسىنامىز. سونداي-اق، ومىرىندە ءبىر رەت بارلىق ادامدارعا لپ(a) ءۇشىن قان ءاناليزىن تاپسىرعان ءجون، بۇل دا ليپيدتەر الماسۋىنىڭ كورسەتكىشى، ول گەنەتيكاعا بايلانىستى جانە ءومىر بويى وزگەرمەيدى. مۇنى 40 جاستان اسقان بارلىق (ءتىپتى ساۋ) ادامدار ءۇشىن جاساۋ وتە ماڭىزدى»، – دەيدى كارديولوگيا جانە ىشكى اۋرۋلار عزي كارديولوگيا بولىمشەسىنىڭ كارديولوگ دارىگەرى ۆيتاليي سەرگەيەۆيچ.
ال ەگەر سىزدە ءقاۋىپ فاكتورلارى بولسا (تەمەكى شەگۋ، جوعارى حولەستەرين، گيپەرتونيا، قانت ديابەتى، ارتىق سالماق نەمەسە سەمىزدىك)، وندا مۇمكىندىگىنشە ەرتەرەك جانە ءومىر بويى جۇيەلى تۇردە جۇگىنگەن دۇرىس.
اتەروسكلەروز جاستارعا دا اسەر ەتۋى مۇمكىن، اسىرەسە ءسىزدىڭ وتباسىڭىزدا ەرتە (50 جاسقا دەيىن) ينفاركت، ينسۋلت جانە كەنەتتەن جۇرەك ءولىمى بولسا – وندا 2 جاسقا تولعاننان باستاپ مۇمكىندىگىنشە ەرتەرەك تەكسەرۋدەن وتكەن ءجون.