ەلىمىزدە جاستاردىڭ عىلىمي جۇمىستارىنا باسا كوڭىل بولۋدە.
سونىڭ ءبىر ناقتى كورىنىسى – بىلتىر ءبىر توپ جاس عالىمنىڭ «تاۋەلسىزدىك ۇرپاقتارى» گرانتىن يەلەنۋى. سونداي وزىق ويلى تالاپكەر جاستىڭ ءبىرى – «نەيروندى جۇيەمەن جۇمىس ىستەيتىن بيونيكالىق پروتەز» عىلىمي جوباسىنىڭ اۆتورى بىرلىك مايرون ۇلى ساعيتجانوۆ. بۇگىن ءبىز جاس زەرتتەۋشىنىڭ عىلىمي جوباسىن وقىرماندارىمىزعا تانىستىرعاندى ءجون كوردىك.
«بۇل جوبانىڭ ماقساتى – ادام نەيروندى جۇيەمەن تولىق ينتەگراسيالاناتىن ۋلترازاماناۋي بيونيكالىق پروتەز جاساۋ. بۇل جوبادا نەيروينجەنەريا، بيونيكا مەن ماتەريالتانۋ سالالارىنداعى سوڭعى جەتىستىكتى پايدالانا كەلە، كەڭ قوزعالىس فۋنكسياسىن قالپىنا كەلتىرىپ قانا قويماي، پايدالانۋشىلارعا قوزعالىسىن ءدال ءارى تابيعي باسقارۋعا مۇمكىندىك بەرەتىن جەتىلدىرىلگەن پروتەز ازىرلەۋدى كوزدەگەنمىن»، – دەپ مالىمدەدى قازاق ۇلتتىق ۋنيۆەرسيتەتىنىڭ اعا وقىتۋشىسى، ماگيستر بىرلىك ساعيتجانوۆ.
جوبانىڭ نەگىزگى ەرەكشەلىگىنە ءار پايدالانۋشىنىڭ جەكە نەيروندىق ۇلگىسىنە بەيىمدەلەتىن ءاداپتيۆتى وقىتۋ الگوريتمى كىرەدى. قولدانۋ ىڭعايلىلىعىنا، ەستەتيكا مەن جايلىلىققا باسىمدىق بەرىلىپ، پايدالانۋشىنىڭ جالپى تاجىريبەسىن جاقسارتۋ كوزدەلەدى.
«قاۋىپسىزدىك پەن سەنىمدىلىك – جوبا ازىرلەۋدىڭ نەگىزگى اسپەكتىلەرى. قۇرىلعىنىڭ ءتۇرلى جاعدايدا تۇراقتى جۇمىسىن قامتاماسىز ەتۋدە قورعانىس مەحانيزمىن ەنگىزۋگە ەرەكشە كوڭىل بولىنەدى. جوبا مەديسينالىق سەرتيفيكات الۋعا باعىتتالعان. بۇل جاعداي پروتەزدىڭ كلينيكالىق قولدانۋعا ارنالعان قاۋىپسىزدىك ستاندارتىنا ساي كەلۋىن قامتاماسىز ەتەدى»، – دەيدى PhD كانديداتى بىرلىك مايرون ۇلى.
بۇگىندە پروتەزدىڭ 3D كودى سىزىلىپ، تەوريالىق ەسەپتەۋ مەن زەرتتەۋ جۇرگىزىلۋدە. قازاق ۇلتتىق ۋنيۆەرسيتەتىندە روبوتوتەحنيكالىق جۇيەلەر ماماندىعىندا وقيتىن ستۋدەنتتەر دە زەرتتەۋ جۇرگىزىپ، باسقا دا نۇسقالار تالقىلانۋدا. اتالعان نۇسقالار 3D فورماتىندا Solid Works باعدارلاماسىندا زەرتتەلىپ، زەردەلەنۋدە.
«قاجەت جابدىقتاردى ساتىپ الۋ ناۋرىز ايىنا جوسپارلانعان. دەمەك، ءبىرىنشىسى – تەوريا، ەكىنشىدەن – جابدىق الۋ، ودان كەيىنگىسى – قۇراستىرۋ، پراكتيكالىق جۇمىستار. جوبا وسىلاي رەت-رەتىمەن جۇزەگە اسادى. سودان كەيىن اتقارىلعان جۇمىسقا ەسەپ بەرىلەدى» دەيدى جاس عالىم بىرلىك.