2024 جىلعى 7-14 شىلدە ارالىعىندا استانادا IBO-2024 بيولوگيادان 35ء-شى حالىقارالىق وليمپيادا وتەدى. بۇل وقۋشىلار اراسىنداعى ەڭ بەدەلدى وليمپيادالاردىڭ ءبىرى.
بيىل وعان الەمنىڭ ءار تۇكپىرىنەن ەڭ مىقتى 305 جاس بيولوگ قاتىسادى، دەپ حابارلايدى Almaty-akshamy.kz وقۋ-اعارتۋ مينيسترلىگىنە سىلتەمە جاساپ.
ەلىمىزدىڭ قۇراما كومانداسىنا وليمپيادالىق رەزەرۆ اراسىندا ەڭ جوعارى رەيتينگكە يە بولعان ءتورت وقۋشى مەن ەكى جەتەكشى كىردى:
- عالىمجان باقتىباي - «ءبىلىم-يننوۆاسيا» دارىندى بالالارعا ارنالعان ليسەي-ينتەرناتىنىڭ 11 سىنىپ وقۋشىسى. جالپى ءبىلىم بەرەتىن پاندەر بويىنشا رەسپۋبليكالىق وليمپيادانىڭ ءۇش التىن، IBO-2023 وليمپياداسىنىڭ قولا مەدالىنىڭ، اۆيسەننا اتىنداعى حالىقارالىق وليمپيادانىڭ كۇمىس مەدالىنىڭ يەگەرى؛
- امينا تىنىرباي - №10 دارىندى بالالارعا ارنالعان «ءبىلىم-يننوۆاسيا» قىزىلوردا وبلىستىق ليسەي-ينتەرناتىنىڭ 11 سىنىپ وقۋشىسى. 2024 جىلعى جالپى ءبىلىم بەرەتىن پاندەر بويىنشا رەسپۋبليكالىق وليمپيادانىڭ التىن مەدالىنىڭ، National Brain Bee رەسپۋبليكالىق وليمپياداسىنىڭ قولا مەدالىنىڭ، اۆيسەننا اتىنداعى حالىقارالىق وليمپيادانىڭ كۇمىس مەدالىنىڭ يەگەرى؛
- نۇرتورە تورەحان ۇلى - شىعىس قازاقستان وبلىستىق دارىندى بالالارعا ارنالعان «ءبىلىم-يننوۆاسيا» مامانداندىرىلعان ليسەيىنىڭ 11 سىنىپ وقۋشىسى. National Brain Bee رەسپۋبليكالىق وليمپياداسىندا التىن مەدال، International Mendel'S Biology Olympiad-2023 وليمپياداسىندا التىن مەدال، 2024 جىلعى جالپى ءبىلىم بەرەتىن پاندەر بويىنشا رەسپۋبليكالىق وليمپيادادا التىن مەدال يەگەرى؛
- دياس سۇلەيمەنوۆ - اقتوبە وبلىستىق «ءبىلىم-يننوۆاسيا» ليسەي-ينتەرناتىنىڭ 11 سىنىپ وقۋشىسى. جالپى ءبىلىم بەرەتىن پاندەر بويىنشا رەسپۋبليكالىق وليمپيادانىڭ ەكى مارتە التىن مەدالىنىڭ يەگەرى، International Mendel'S Biology Olympiad-2022-دە التىن مەدال، اۆيسەننا اتىنداعى حالىقارالىق وليمپيادادا قولا جۇلدەگەر يەگەرى.
جەتەكشىلەرى: باۋىرجان سمايلوۆ - بيوتەحنولوگيا ماگيسترى، IBO-2007 حالىقارالىق وليمپياداسىنىڭ قولا جۇلدەگەرى؛ ەرنار باتىرجانوۆ – ۋلسان ۇلتتىق عىلىم جانە تەحنولوگيالار ينستيتۋتىنىڭ (UNIST، كورەيا) ستۋدەنتى، بيولوگيا بويىنشا حالىقارالىق جانە رەسپۋبليكالىق وليمپيادانىڭ جەڭىمپازى.
انىقتاما: وليمپيادا تەوريالىق جانە 4 پراكتيكالىق تۋردان تۇرادى (بيوحيميا، مولەكۋلالىق بيولوگيا، بيوينفورماتيكا، اناتوميا جانە جانۋارلار فيزيولوگياسى). IBO-عا قازاقستان قۇراما كومانداسى 1996 جىلدان بەرى قاتىسىپ كەلەدى. وسى جىلدار ىشىندە ەل قۇراماسى 2 التىن، 20 كۇمىس، 54 قولا مەدال، 14 گراموتا جەڭىپ الدى. ەلىمىزدىڭ قورجىنىندا 90 ماراپات بار.