قىتايداعى ەڭ اۋقاتتى ادامداردىڭ ءبىرى – دجەك مانىڭ ۇلىنا جازعان حاتىنان ۇزىندىلەر بەرەيىك. «ساعان ايتاتىندارىمنىڭ بارلىعى مەنىڭ ءومىر جولىمدا كەزدەسكەن كەدەرگىلەردەن العان ساباقتارىم، سوندىقتان وسى ساتسىزدىكتەرىمدى قايتالاماۋىڭ ءۇشىن پايداسى بولار دەپ ويلادىم»، – دەيدى ول.
- سەنى جاقتىرماعان، ساعان ناشار كوزقاراسپەن قاراعان ادامدارعا ەشقاشان رەنجىمە، ويتكەنى ساعان اناڭ ەكەۋىمىزدەن باسقا ەشكىم دە بورىشتار ەمەس.
- تابىسقا جەتكەن كوپتەگەن كاسىپكەردىڭ ءبىلىمى ورتاشا بولعان، ءبىراق بۇل قۇلشىنا ۇيرەنبەگەن ادام دا تابىسقا جەتە الادى دەگەن ءسوز ەمەس. ەسىڭدە بولسىن، بالام، ءبىلىمىڭ – ەشكىم سەنەن تارتىپ الا المايتىن ەڭ مىقتى قارۋىڭ. ادام ءبىلىمسىز دە كاسىپ ەتە الادى، ءبىراق ونى ءبىلىمسىز ءبارىبىر دامىتا المايدى.
- قالعان ومىرىمدە مەن ساعان «مەنى ب ا ق» دەپ تالاپ قويمايمىن، ءدال سول سياقتى سەن كامەلەتتىك جاسقا جەتكەن سوڭ مەنىڭ دە جاۋاپكەرشىلىگىم اياقتالادى. ءومىر بويى قوعامدىق كولىكپەن جۇرەسىڭ بە، الدە «مەرسەدەس» مىنەسىڭ بە، قارا كوجە ىشەسىڭ بە، الدە شىلقىعان ماي جالايسىڭ با، ول ءوز قولىڭدا!
- ءارقاشان ۋادەگە بەرىك بول، ءبىراق باسقالارعا بۇل تالاپتى قويا المايسىڭ. باسقالارعا ۇنەمى ىلتيپاتپەن قارا، ءبىراق باسقالارعا دا وزىڭە جاقسى كوزبەن قارا دەپ تالاپ قويا المايسىڭ. سەن ولارعا قالاي قاراساڭ، ولار دا ساعان سولاي قاراي بەرمەيدى. ەگەر وسى اقيقاتتى جەتە تۇسىنە الماساڭ، ءومىر جولىڭدا كەلەڭسىزدىكتەرگە ۇشىراي بەرەسىڭ.
- ءومىر ءبىر-اق رەت بەرىلەدى. سوندىقتان تۋىستارىڭدى، جاناشىر جاقىندارىڭدى قادىرلەي ءبىل. ەكەۋىمىز دە ماڭگى بىرگە بولا المايمىز، قارا كوز جۇمىلعان سوڭ ەشقاشان قاۋىشا المايمىز.
نۇر جامال.