الماتى قالالىق جەدەل شۇعىل كومەك كورسەتۋ اۋرۋحاناسىندا كەزەكتى دونور كۇنى ناۋقانى ءوتتى. قالالىق قان ورتالىعىمەن بىرلەسىپ ۇيىمداستىرىلاتىن مۇنداي اكسيا اۋرۋحانادا جىل سايىن وتكىزىلەدى.
قالالىق جەدەل شۇعىل كومەك كورسەتۋ اۋرۋحاناسىنىڭ باس دارىگەرى الماز دجۋۆاشيەۆ باستاعان اۋرۋحانا ۇجىمى بۇل باستامانى تاعى ءبىر قولداپ، دونور اتاندى.
دارىگەرلەر مەن مەديسينا ماماندارى باسقالاردىڭ ءومىرىن ساقتاپ قالۋ ءۇشىن ۇنەمى قان تاپسىرۋدىڭ ماڭىزدىلىعىن تۇسىنەدى. سونىمەن قاتار، دونورلىق دونوردىڭ دەنساۋلىعىن ساقتاۋعا، يممۋنيتەتتى ارتتىرۋعا جانە قاننىڭ جاعدايىن جاقسارتۋعا كومەكتەسەدى.
دونور كۇنى ناۋقانى – قانعا مۇقتاج جاندارعا كومەكتەسۋ عانا ەمەس، سونىمەن قاتار ءارقايسىمىزدىڭ دەنساۋلىعىمىزدى تەكسەرۋ مۇمكىندىگى. قالالىق قان ورتالىعى قىزمەتكەرلەرىنىڭ ايتۋىنشا، ءاربىر دونور ءوز قانىنىڭ بوسقا كەتپەيتىنىنە جانە بىرەۋدىڭ ءومىرىن ساقتاپ قالۋعا كومەكتەسەتىنىنە سەنىمدى بولا الادى.
بىلتىر قازاندا اۋرۋحانانىڭ 45 قىزمەتكەرى 22 ليتر قان تاپسىرسا، بۇگىنگى ناۋقانعا 66 ادام قاتىستى. اكسياعا قاتىسۋشىلاردىڭ قاتارىندا بۇعان دەيىن دە بىرنەشە رەت قان تاپسىرعان قىزمەتكەرلەر مەن مۇنداي ءماندى دە يگى ءىستى العاش رەت قولعا العان دونورلار دا بار. اۋرۋحانا قىزمەتكەرلەرى بۇل كۇنى بارلىعى 30 ليتر قان تاپسىردى.
اۋرۋحانا اكىمشىلىگى قالالىق قان ورتالىعىنا اۋرۋحانا قىزمەتكەرلەرىنە ەشقايدا شىقپاي، جۇمىس ورنىندا قان تاپسىرۋعا مۇمكىندىك بەرگەنى ءۇشىن العىسىن ءبىلدىردى.