كيبەركەڭىستىكتەگى تەررورشى توپتاردىڭ پايدا بولۋ تاريحى كۇنى كەشە عانا. ماسەلەن، 1998 جىلى اقش-تىڭ «شەتەلدىك تەرروريستىك ۇيىمدار» تىزىمىنە ەنگەن 30 تەرروريستىك ۇيىمدارىنىڭ شامامەن 50% عانا ۆەب-سايتتارى بولسا، 2000 جىلداردان باستاپ بارلىعى عالامتور جۇيەسىن پايدالانعانى انىقتالدى.
قازىرگى تاڭدا عالامتورداعى تەرروريزم ول ديناميكالىق قۇبىلىس، ۆەب-سايتتار بىردەن پايدا بولادى، ءوزىنىڭ ءتۇر-تۇرپاتىن ءجيى اۋىستىرادى، ءبىراق ءدال سولاي ەكپىندەپ جويىلادى. كوپ جاعدايدا بۇل اداستىرۋ ءۇشىن جاسالادى. وندا سايتتىڭ ءوزى قالىپ، تەك قانا مەكەنجايى اۋىستىرىلادى. مىسالى، ەڭ باي «ال-كايدا» تەرروريستىك ۇيىمى ءوزىنىڭ ۆەب-سايتىن، مەكەن-جايى مەن كونتەنتىن كۇندەلىكتى اۋىستىرىپ تۇرادى.
1980 جىلداردىڭ اياعىندا كومممەرسيالىق پايدالانۋشىلارعا مۇمكىندىك بەرۋ ناتيجەسىندە عالامتور سيپاتتاماسى تەز وزگەرە باستادى. 1990 جىلداردىڭ ورتاسىندا عالامتور 18000 جەكە مەنشىك، قوعامدىق جانە ۇلتتىق جۇيەلەردى بىرىكتىردى. ءححى عاسىردىڭ باسىندا عالامتوردى پايدالانۋشىلاردىڭ سانى 1 ميللياردتان استى. سول ۋاقىتتان باستاپ تەرروريستىك ۇيىمداردا ۇگىت-ناسيحات جۇرگىزۋ، كولداۋشىلارمەن بايلانىسۋ جانە نيەتتەستەردى تابۋ جۇمىستارى باستادى.
ادەتتەگىدەي سايتتا تەرروريستتىك نەمەسە ەكسترەميستىك ۇيىمنىڭ تاريحى مەن ونىڭ ءىس-شارالارى، نەگىزىن سالۋشىلار، كوسەمدەرى مەن باتىرلارىنىڭ ءومىرباياندارى، كوزگە تۇسەر ءىرى تىرلىكتەرى، ساياسي جانە يدەولوگيالىق ماقساتتارى، جاۋلارى تۋرالى قاتال سىن پىكىرلەرى جانە اعىمداعى جانالىقتارى كورسەتىلەدى. سايتتا «ازاتتىق ءۇشىن كۇرەس»، «قارسىلاسۋ» دەگەن سوزدەردى ۇنەمى پايدالانادى. كۇش قولدانعانى تۋرالى مورالدىق جانە قۇقىقتىق نەگىزدەرىن تۇسىندىرە كەلە تەرروريستەردىن زورلىق-زومبىلىق ءىس ارەكەتتەرىن ەگجەي-تەگجەيلى سيپاتتامايدى.
تەرروريستىك سايتتار ۇرانداردى پايدالانىپ، جاقتاستارىنا ارنالعان بەلگىلەر، فۋتبولكالار، تۋلار، بەينە، اۋديو ديسكتەردى ساتۋعا قويادى. جەرگىلىكتى تىلدەن باسقا تىلدەگى سايتتار، تىكەلەي قاقتىعىسقا قاتىسى جوق، ءبىراق وسى ماسەلەدە قىزىعۋشىلىعى بار حالىقارالىق اۋديتورياعا ارنالعان. سول سەبەپتى، كوپتەگەن سايتتار بىرنەشە تىلدە جاسالعان. مىسالى، «وزبەكستان يسلام قوزعالىسى» وزبەك تىلىنەن بولەك اراب، ورىس جانە اعىلشىن تىلدەرىن پايدالانادى.
پسيحولوگيالىق سوعىس. ول دەگەنىمىز جالعان اقپارات تاراتۋ، ۇرەيلى جانە دارمەنسىز ەكەنىن سەزىنۋ ءۇشىن وزدەرىنىڭ جان تۇرشىگەرلىك ىس-ارەكەتتەرىنىڭ سۋرەتتەرىن تاراتۋ. مىسالى، «يسلام مەملەكەتى» تەرروريستىك ۇيىمى تۇتقىندالعان يوردانيا اسكەري اۋە كۇشتەرىنىڭ ۇشقىشى، اعا لەيتەنانت مۋاز يۋسەف ال-كاساسبانى 2015 جىلى 3 اقپاندا تىرىدەي ورتەپ، بەينە روليگىن عالامتور ارقىلى تاراتقان.
تەرروريستىك ۇيىمداردىڭ ىشىندە «ال-كايدا» وسى باعىتتى جاقسى قولداندى دەۋگە بولادى. 2001 جىلى 11 قىركۇيەكتە اقش-تاعى دۇنيەجۇزىلىك ساۋدا ورتالىعىنا جاسالعان تەرروريستىك اكتىدەن كەيىن امەريكانىڭ ەكونوميكاسى السىرەپ، قور بيرجاسى قۇلدىرادى جانە ودان دا «ۇلكەن» شابۋىل ۇيىمداستىرىلىپ جاتىر دەپ قوعامدا ۇرەي تۋعىزدى.
تەرروريستىك ۇيىمداردىڭ عالامتوردى قالاي پايدالانىپ جاتقانىن ءبىز تولىق بىلسەك، وسى باعىتتاعى وزىق تاجىريبەنى پايدالانا وتىرىپ، تەرروريستەردىڭ پايدالانۋ مۇمكىنشىلىگىن شەكتەيتىن شارالاردى قاراستىرۋىمىز كەرەك. بۇل - بۇگىنگى كۇننىڭ ەڭ وزەكتى ماسەلەلەرىنىڭ ءبىرى.