ق ر عىلىم جانە جوعارى ءبىلىم مينيسترلىگىنە قارسى تاعى 10 ءىس قوزعالدى، دەپ حابارلايدى aqshamnews.kz قازتاگ-قا سىلتەمە جاساپ.
«توتەنشە جاعدايعا تاپ بولعان وڭىرلەرگە بولىنگەن كۆوتاعا بايلانىستى تۇلەكتەردىڭ كوپشىلىگى باسىم ماماندىقتار بويىنشا لايىقتى گرانتىن الا المادى، سوندىقتان كەشە جانە بۇگىن عىلىم مينيسترلىگىنە قارسى 10 جاڭا تالاپ-ارىز سوتقا بەرىلدى»، - دەيدى ادۆوكات حاليدا ءاجىعۇلوۆا.
زاڭگەر وزىنە زاڭ كومەگىنە جۇگىنگەن تالاپكەرلەردىڭ بارلىعى دەرلىك وقۋ جىلىنىڭ باستالۋىنا بىرنەشە كۇن قالعاندا مينيسترلىك ءبولۋدى ۇيعارعان قوسىمشا ءبىلىم گرانتتارىن العانى تۋرالى قۋانىشىمەن ءبولىستى.
«عىلىم مينيسترلىگى مەملەكەتتىك ءبىلىم گرانتتارىن ءبولۋ كەزىندە «توتەنشە جاعدايعا تاپ بولعان ايماقتارعا» كۆوتانى قولدانۋداعى قاتەلىگىن ءالى دە مويىندامايدى. عىلىم مينيسترلىگىنىڭ ارەكەتىن نەگە قاتە دەپ سانايمىز؟ ويتكەنى ءبىلىم گرانتتارىن ءبولۋدىڭ كەز كەلگەن كۆوتاسىن تەك پارلامەنت قابىلداپ، پرەزيدەنت قول قويۋى ءتيىس زاڭ تالاپتارى نەگىزىندە عانا بەكىتىلەدى»، - دەيدى زاڭگەر.
ونىڭ ايتۋىنشا، مينيسترلىك مەملەكەتتىك ءبىلىم گرانتتارىن ءبولۋ كەزىندە «توتەنشە جاعدايداعى ايماقتارعا» كۆوتا قولدانعان نورماتيۆتىك قۇقىقتىق اكتىنى ناقتى كورسەتپەگەن.
ەستەرىڭىزگە سالا كەتەيىك، مينيسترلىك سۋ تاسقىنى كەزىندە زارداپ شەككەندەرگە كۆوتا بويىنشا گرانت ءبولۋ تۋرالى شەشىم قابىلداعان بولاتىن. بۇل رەتتە جوعارى بالل جيناعان بالالار تومەن بالل جيناعاندارمەن سالىستىرمالى تۇردە گرانتقا يە بولا المادى. مۇنداي ادىلەتسىزدىككە نارازى بولعاندار سانى ارتىپ، رەنجىپ، ارىزدانۋدا.
الماتىلىق تالاپكەر مەدينا مايسار عىلىم جانە جوعارى ءبىلىم مينيسترلىگىن سوتقا بەردى. ول بۇعان دەيىن پرەزيدەنتكە اشىق ۇندەۋ جاساپ، عىلىم جانە جوعارى ءبىلىم ءمينيسترى ساياسات نۇربەكتى قىزمەتىنەن بوساتۋدى سۇراعان بولاتىن.