ءبىلىم مينيسترلىگى ءمۇعالىم مەن وقۋشى اراسىنداعى جانجالعا تۇسىنىك بەردى

وقۋشىنىڭ اتا-اناسىن جاۋاپكەرشىلىككە تارتۋ ءۇشىن اكىمشىلىك ءىس قوزعالدى

كەشە جەلىدە جوعارى سىنىپ وقۋىشسىنىڭ مۇعالىمگە داۋىس كوتەرىپ، ونى بالاعاتتاپ جاتقان ءساتىنىڭ ۆيدەوسى تاراعان ەدى. ءبىلىم جانە عىلىم مينيسترلىگى اتالعان كەلەڭسىز جايتقا قاتىستى بۇگىن تۇسىنىك بەردى، دەپ حابارلايدى Almaty-akshamy.kz.

مينيسترلىكتىڭ مالىمەتىنشە، ءمۇعالىم مەن وقۋشى اراسىنداعى جانجال الماتى وبلىسى تالدىقورعان قالاسىنداعى №4 مەكتەپتە بولعان.

«11 ناۋرىز كۇنى بيولوگيا ساباعىندا 2005 جىلى تۋعان وقۋشى مۇعالىممەن قاتتى داۋىسپەن بالاعات سوزدەر ايتىپ سويلەسكەن. ءمۇعالىم تالدىقورعان قالاسىنىڭ پوليسيا بولىمىنە ارىز جازعان. قازىرگى تاڭدا وقۋشىعا قاتىستى ق ر اقبتك-نىڭ 434-بابىنىڭ 1-بولىگى (ۇساق بۇزاقىلىق) بويىنشا اكىمشىلىك حاتتاما تولتىرىلدى. شەشىمدى الماتى وبلىسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتى قابىلدايدى.
ەستەرىڭىزگە سالا كەتەيىك، كامەلەتكە تولماعان بالالاردىڭ ىس-ارەكەتتەرى ءۇشىن اتا-انالاردىڭ جاۋاپكەرشىلىگى قاراستىرىلعان»،-دەلىنگەن حابارلامادا.

وسى ىسكە بايلانىستى وقۋشىنىڭ اتا-اناسىن جاۋاپكەرشىلىككە تارتۋ ءۇشىن اكىمشىلىك ءىس قوزعالدى. سونىمەن قاتار بەلگىلەنگەن تارتىپپەن وقۋشىنى ەسەپكە قويۋ جانە وعان پسيحولوگيالىق كومەك كورسەتۋ تۋرالى ماسەلە دە قارالادى.

«ايتا كەتەيىك، مۇعالىمدەرگە دەگەن مۇنداي كوزقاراسقا جول بەرىلمەيدى. تەك مۇعالىمدەر عانا ەمەس، اتا-انالار دا بالالارمەن قوعامدا ءوزىن قالاي ۇستاۋ كەرەگى تۋرالى اڭگىمەلەر جۇرگىزۋى ماڭىزدى»،-دەلىنگەن حابارلامادا.