تۇركىستان وبلىسىنىڭ ءبىلىم بەرۋ سالاسىنىڭ قىزمەتكەرلەرى 2 ملرد تەڭگەدەن استام سوما جىمقىردى دەگەن كۇدىككە ءىلىندى.
سىبايلاس جەمقورلىققا قارسى قىزمەت ءبىلىم بەرۋ سالاسىنداعى جۇيەلى جەمقورلىقتى انىقتاۋ بويىنشا جۇمىستى جالعاستىرۋدا، دەپ حابارلايدى اlmaty-akshamy.kz انتيكورعا سىلتەمە جاساپ.
بۇعان دەيىن الماتى، شىمكەنت قالالارى مەن قىزىلوردا، اقتوبە، الماتى جانە جەتىسۋ وبلىستارىندا قىلمىستىق سحەمالار اشىلعان بولاتىن. تۇركىستان وبلىسى بويىنشا سىبايلاس جەمقورلىققا قارسى قىزمەت شاردارا جانە سارىاعاش اۋداندارىنىڭ ءبىلىم بولىمدەرىنىڭ بۋحگالتەرلەرىنە قاتىستى سوتقا دەيىنگى تەرگەۋ جۇرگىزۋدە. ولار بيۋدجەت قاراجاتىن اسا ءىرى كولەمدە جۇيەلى نەگىزدە جىمقىردى دەگەن كۇدىك بار. تەرگەۋ مالىمەتتەرى بويىنشا، كۇدىكتىلەر 2020-2023 جىلدار ارالىعىندا ءبىلىم بەرۋ سالاسىندا جۇمىس ىستەمەيتىن تۇلعالاردىڭ شوتتارىنا اقشا قاراجاتىن اۋدارۋ، سونداي-اق مەكتەپ قىزمەتكەرلەرىنە جوعارى جالاقى ەسەپتەۋ ارقىلى شامامەن 2،6 ملرد تەڭگە سوما جىمقىرعان. قازىرگى ۋاقىتتا تۇركىستان وبلىسىنىڭ ءبىلىم بەرۋ سالاسىنان 17 ادام قىلمىستىق جاۋاپكەرشىلىككە تارتىلعان. ولاردىڭ 4ء-ى قاماۋعا الىنىپتى.
زالالدى وتەۋ ماقساتىندا 39 جىلجىمايتىن مۇلىك، 44 اۆتوماشينا، زەرگەرلىك بۇيىمدار جانە قىلمىستىق ىستەر بويىنشا ايىپتالۋشىلاردىڭ اقشالاي قاراجاتتارى بۇعاتتالدى. سونىمەن قاتار، تەرگەۋ بارىسىندا تۇركىستان وبلىسىنىڭ تەكسەرۋ كوميسسياسىنىڭ مەملەكەتتىك اۋديتورىنىڭ ارەكەتى اشكەرەلەندى. ول سارىاعاش اۋدانىنداعى مەكتەپتەردىڭ بىرىندە اۋديت بارىسىندا انىقتالعان جىمقىرۋ فاكتىلەرىن پايداكۇنەمدىك نيەتپەن جاسىرعان. سونداي-اق، جەتىسۋ وبلىسىندا ۇيىمداسقان قىلمىستىق توپتىڭ قۇرامىندا 2،5 جىل ىشىندە 4،4 ملرد تەڭگە جىمقىرعان قالالىق ءبىلىم ءبولىمىنىڭ قىزمەتكەرلەرىنە قاتىستى سوتقا دەيىنگى تەرگەۋ اياقتالدى. قىلمىستىق توپقا باسشى مەن ونىڭ قاراماعىنداعىلار، سونداي-اق ورتا مەكتەپ بۋحگالتەرى كىرەتىن بارلىعى 13 ادامنان قۇرالعان.
قىلمىستىق-پروسەستىك كودەكسىنىڭ 201-بابىنا سايكەس وزگە اقپارات جاريا ەتۋگە جاتپايدى. كونستيتۋسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروسەستىك كودەكسىنىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.