قازاقستاندا جاساندى ينتەللەكت ماماندارىن جاپپاي دايارلاۋ باستالدى، دەپ حابارلايدى aqshamnews.kz
عىلىم جانە جوعارى ءبىلىم ۆيسە-مينيسترى گۇلزات كوبەنوۆانىڭ سوزىنشە، ستۋدەنتتەر ءوز ماماندىعى بويىنگا ءجي-دى مەڭگەرەدى.
بيىلعى وقۋ جىلىنىڭ تاعى ءبىر ەرەكشەلىگى – ءبىلىم باعدارلامالارىنا AI-Sana جوباسىنىڭ كىرىكتىرىلۋى. پرەزيدەنتىمىز قاسىم-جومارت كەمەل ۇلىنىڭ تاپسىرماسى بويىنشا AI-Sana باعدارلاماسى وسى جىلى ىسكە قوسىلدى. بۇل باعدارلاما ستۋدەنتتەردىڭ ءبىلىمدى قوعام مەن بولاشاق ەكونوميكاسى ءۇشىن قۇندى جوبالارعا اينالدىرا الۋىنا جاعداي جاسايدى. ءاربىر ستۋدەنت ءوز ماماندىعىندا جاساندى ينتەللەكتتى قولدانۋدى مەڭگەرىپ، بولاشاقتا جاڭا تەحنولوگيالار جاساپ نەمەسە ستارتاپتار اشا الادى، - دەدى كوبەنوۆا.
AI-Sana باعدارلاماسى بازالىق وقىتۋ، تەرەڭدەتىلگەن دايىندىق، جوبالار ازىرلەۋ، اكسەلەراسيا سەكىلدى بىرنەشە كەزەڭنەن تۇرادى.
بازالىق وقىتۋ. الدىمەن 100% ستۋدەنت Coursera، Huawei جانە Astana Hub پلاتفورمالارىندا جي نەگىزدەرىن مەڭگەرەدى. بۇل ءبىلىمدى بارلىق باكالاۆرلار، ماگيسترانتتار جانە دوكتورانتتار يگەرەدى.
تەرەڭدەتىلگەن دايىندىق. كەيىن ارنايى ادىستەمەلىك باعدارلاما جاسالىپ، ستۋدەنتتەر كاسىپكەرلىكتىڭ نەگىزدەرىن، ءجي-دى ناقتى جوبالاردا قولدانۋدى جانە جاڭا يدەيالار جاساۋدى ۇيرەنەدى.
جوبالاردى ازىرلەۋ. كەلەسى كەزەڭدە ستۋدەنتتەر ءوز جوبالارىن جاساپ، ولاردى مەنتورلار مەن ساراپشىلاردىڭ كومەگىمەن دامىتادى.
اكسەلەراسيا. سوڭعى كەزەڭدە ۇزدىك يدەيالار ستارتاپقا اينالىپ، اكسەلەراسيادان ءوتىپ، حالىقارالىق دەڭگەيگە شىعارىلادى.
مينيسترلىك وكىلىنىڭ دەرەگىنشە، قازىرگى ۋاقىتتا جي نەگىزدەرى بويىنشا كۋرستان 390 مىڭنان استام ستۋدەنت ءوتتى، ال 3 مىڭنان استام وقىتۋشى سەرتيفيكات الدى.
ستۋدەنتتەرىمىز چات-بوتتاردى بەلسەندى تۇردە جاساپ جاتىر. 119 جاساندى ينتەللەكت اگەنتى ازىرلەنىپ، تەستىلەنىپ جاتىر، تاعى جۇزدەگەنى دايىندالۋ ۇستىندە. باعدارلامانى ءساتتى ىسكە اسىرۋ ءۇشىن الەمدىك ساراپشىلار مەن پروفەسسورلار تارتىلادى. بۇگىندە جاساندى ينتەللەكت كۋرستارى بارلىق ۋنيۆەرسيتەتتەردە مىندەتتى پانگە اينالدى. 93 جوعارى وقۋ ورنى ءوز باعدارلامالارىن بەيىمدەدى، ال 20 ۋنيۆەرسيتەت 25 جاڭا ءبىلىم بەرۋ باعدارلاماسىن اشتى، - دەدى گۇلزات كوبەنوۆا.
ۆيسە-مينيستر ناتيجەسىندە قازاقستاندا جاساندى ينتەللەكت ماماندارىن جاپپاي دايارلاۋ باستالعانىن اتاپ ءوتتى. بۇل ەلىمىزدىڭ اقش، جۇڭگو جانە فينليانديا سياقتى ءجي-دى كەڭىنەن ەنگىزگەن الدىڭعى قاتارلى مەملەكەتتەردىڭ قاتارىنا قوسىلۋىنا جول اشادى.
بۇل قادامدار قازاقستاندىق ءبىلىم بەرۋ جۇيەسىن نىعايتىپ، ۇزدىك حالىقارالىق تاجىريبەلەردى ەنگىزۋگە جانە شەتەلدىك ستۋدەنتتەر سانىن ارتتىرۋعا مۇمكىندىك بەرەدى.