بيىلعى ساياسي ماۋسىم ءبىرقاتار ستراتەگيالىق كادرلىق اۋىسسىممەن باستالدى. كىم كەتتى؟ كىم قالدى؟ اقوردا نە دەيدى؟ تولىعىراق aqshamnews.kz ماتەريالىندا.
پرەزيدەنت جارلىعىمەن ءبىرقاتار ماڭىزدى تاعايىنداۋلار جاسالدى:
- وقۋ-اعارتۋ ءمينيسترى بولىپ 42 جاستاعى جۇلدىز سۇلەيمەنوۆا كەلدى (بۇرىن ءماجىلىس دەپۋتاتى)،
- جاساندى ينتەللەكت جانە سيفرلىق دامۋ مينيسترلىگىن جاسلان مادييەۆ باسقاردى (ۆيسە-پرەمەر قىزمەتىن قاتار اتقارادى)،
- سىرتقى ىستەر ءمينيسترى بولىپ ەرمەك كوشەربايەۆ تاعايىندالدى.
قىزمەتىنەن كەتكەندەر قاتارىندا:
- مۇرات نۇرتىلەۋ؛
- تامارا دۇيسەنوۆا؛
- ەرنار باسپايەۆ؛
- كۇنسۇلۋ زاكاريا؛
- قانات شارلاپايەۆ.
اقوردا نە دەيدى؟
پرەزيدەنتتىڭ كومەكشىسى - باسپا ءسوز حاتشىسى رۋسلان جەلدىباي كادرلىق وزگەرىستەردى ءتۇسىندىردى.
كەيىنگى كادرلىق وزگەرىستەرگە بايلانىستى ب ا ق وكىلدەرىنەن كوپتەگەن ساۋال تۇسكەن. ونىڭ ايتۋىنشا، بۇل - ادەتتەگى كادرلىق روتاسيا. نەگىزگى ماقسات - مەملەكەتتىك جۇيەدەگى ەڭ ماڭىزدى باعىتتاردىڭ تيىمدىلىگىن كۇشەيتۋ.
"مەملەكەت باسشىسى جۋىرداعى جولداۋىندا ۇلتتىق ەكونوميكاعا تۇسەتىن ينۆەستيسيا كولەمىن ارتتىرۋدى باسىم مىندەتتىڭ ءبىرى رەتىندە بەلگىلەدى.
بۇل ماڭىزدى سالا تاجىريبەلى ديپلومات مۇرات نۇرتىلەۋگە جۇكتەلدى. پرەزيدەنتتىڭ كومەكشىسى رەتىندە ول حالىقارالىق ينۆەستيسيالىق جانە ساۋدا ىنتىماقتاستىعىن ىلگەرىلەتۋ ماقساتىندا شەت مەملەكەتتەردىڭ جوعارى دەڭگەيدەگى وكىلدەرىمەن، سونداي-اق الەمدىك ءىرى كومپانيالاردىڭ جەتەكشىلەرىمەن بايلانىستى دامىتادى.
مەملەكەت باسشىسىنىڭ جارلىعىمەن جاسلان مادييەۆ پرەمەر-مينيستردىڭ ورىنباسارى - جاساندى ينتەللەكت جانە سيفرلىق دامۋ ءمينيسترى بولىپ تاعايىندالدى. ۆەدومستۆو باسشىسى جولداۋدا ايتىلعان قازاقستاندى سيفرلىق مەملەكەتكە اينالدىرۋ جونىندەگى ماقساتتى ىسكە اسىرۋمەن شۇعىلدانادى. پرەزيدەنت مينيسترگە ستراتەگيالىق ماڭىزى زور جۇمىستى اتقارۋعا قاتىستى باعىت-باعدار بەردى.
سونىمەن قاتار پرەمەر-مينيستردىڭ كەلىسىمى بويىنشا ءماجىلىس دەپۋتاتى جۇلدىز سۇلەيمەنوۆانى وقۋ-اعارتۋ ءمينيسترى لاۋازىمىنا تاعايىنداۋ تۋرالى شەشىم قابىلداندى. جاڭا مينيستر قوعامداعى بەلسەندى قىزمەتىمەن جانە ءبىلىم بەرۋ سالاسىنداعى مول تاجىريبەسىمەن بەلگىلى"، - دەپ ءتۇسىندىردى رۋسلان جەلدىباي.
الماتىدا اكىم دارحان ساتىبالدى جاڭا ورىنباسارلار تاعايىندادى:
- نۇرلان ءابدىراحىم؛
- الماسحان سماتلايەۆ.