شاحماتتان ەكى دۇركىن الەم چەمپيونى ءبيبىسارا اساۋبايەۆا FIDE ايەلدەر اراسىنداعى الەمدىك شاحمات رەيتينگىندە بليس ساناتىندا بەسىنشى ورىنعا كوتەرىلدى.
حالىقارالىق شاحمات فەدەراسياسىنىڭ جاڭارتىلعان رەيتينگى بويىنشا 19 جاستاعى قازاقستاندىق ءبيبىسارا اساۋبايەۆا بليس كاتەگورياسى بويىنشا الەمنىڭ ۇزدىك شاحماتشىلارى تىزىمىندە جوعارىلادى، دەپ حابارلايدى Almaty-akshamy.kz Egemen.kz-كە سىلتەمە جاساپ.
ول 2461 ۇپاي جيناپ، FIDE رەيتينگىنىڭ بەسىنشى ساتىسىنا كوتەرىلدى. سونىمەن قاتار ءبيبىسارا - بليس ساناتىنداعى الەمنىڭ ەڭ مىقتى 20 شاحماتشىسىنىڭ ىشىندەگى ەڭ جاس شاحماتشى.
ءبيبىسارا اساۋبايەۆانىڭ بۇل كورسەتكىشى ونىڭ الەمدىك شاحمات ارەناسىنداعى سوڭعى جەتىستىگىمەن بايلانىستى بولدى. ول ەكى جىل قاتارىنان بليس بويىنشا الەم چەمپيونى اتاندى. 2023 جىلى نيۋ-دەليدە (ءۇندىستان) وتكەن گران-پريدە ب.اساۋبايەۆا ۇزدىك ۇشتىكتىڭ تىزىمىندە بولدى. ودان كەيىن قازاقستان مەن الەم قۇرامالارى اراسىنداعى كەزدەسۋدە ءبيبىسارا ءتورت دۇركىن الەم چەمپيونى، ايەلدەر اراسىنداعى فيدە رەيتينگىنىڭ كوشباسشىسى قىتايلىق حوۋ يفاندى ەكى رەت ۇتتى.
20 ساۋىردە سپورت جانە مادەنيەت ءمينيسترى اسحات ورالوۆ ب.اساۋبايەۆاعا قازاقستان رەسپۋبليكاسىنىڭ ەڭبەك سىڭىرگەن سپورت شەبەرى جوعارى اتاعىن بەردى. ول بۇل اتاققا يە بولعان تۇڭعىش قازاق شاحماتشىسى بولدى.