بۇلبۇل ءانشىنىڭ ۇيىنە بيۋللەتەن سالىناتىن ءمولدىر جاشىكپەن بارعان وكىلدەر مەرەكەلىك كوڭىل-كۇي سىيلاۋ ءۇشىن اۋەلى ءبىر قۇشاق گۇل ۇسىندى.
اتى اڭىزعا اينالعان بۇلبۇل ءانشىمىز بيبىگۇل تولەگەنوۆا دا بۇگىن ءوز تاڭداۋىن جاسادى، دەپ حابارلايدى Almaty-akshamy.kz
«سايلاۋ كۇنى – مەن ءۇشىن ۇلكەن مەرەكە. ءبىزدىڭ كەزىمىزدە سايلاۋعا قۋانا-قۋانا باراتىنبىز. ءان سالىپ، بي بيلەپ، كونسەرت بەرەتىنبىز، ەلدىڭ كوڭىلىن كوتەرەتىنبىز. ۇلكەندەرمەن بىرگە قۋاناتىنبىز. شىنى كەرەك، قازىرگى كەيبىر جاستار جالقاۋلاۋ، ىستەگەن ىسىنە اقشا تولەسە ەكەن دەپ تۇرادى. ال ءبىز رياسىز كوڭىلمەن، العاۋسىز جۇرەگىمىزبەن پاتريوت بولدىق. ەڭ العاش داۋىس بەرگەن ءساتىم دە ءالى ەسىمدە. ول 1948 جىل بولاتىن، 18 جاستا ەدىم. ديماش احمەت ۇلى قونايەۆقا جانە بيولوگ-عالىم ءنايلا بازانوۆاعا داۋىس بەرگەنمىن. ۇيىمنەن بولسا دا، بۇگىن دە داۋىس بەرىپ جاتىرمىن. داۋىس بەرۋ – ءاربىر سانالى ادامنىڭ مىندەتى، پارىزى بولۋعا ءتيىس. ەلىم كوركەيە تۇسسە دەگەن انالىق تىلەگىم شەكسىز، اينالايىندارىم! ءار ادام وسىلاي جاساۋعا ءتيىس. ءوزىمىز وسى مەملەكەتتە تۇرىپ، ونىڭ بار جاقسىسىن الىپ وتىرعاندىقتان، نەگە داۋىس بەرمەسكە. «مەملەكەت ماعان نە بەرەدى» دەپ كۇتىپ وتىرماي، «مەن وعان نە بەرەمىن» دەۋ كەرەك. بۇل ورايدا، اسىرەسە، جاستارعا سەنىم ارتقىم كەلەدى»، – دەدى بيبىگۇل احمەت قىزى.