شىمبۇلاقتا سەرۋەندەپ جۇرگەن جاس جىگىت ابايسىزدا سايعا قۇلاپ كەتتى

جابىرلەنۋشىنىڭ كۋرەر بولىپ جۇمىس ىستەيتىنى بەلگىلى بولدى.

الماتى قالاسىنىڭ پوليسەيلەرى شىمبۇلاقتا سايعا قۇلاپ كەتكەن ەر ادامدى امان الىپ قالدى. ول سەرۋەندەۋگە شىققان كۋرەر بولىپ جۇمىس ىستەيتىن جىگىت بولىپ شىقتى، دەپ حابارلايدى Almaty-akshamy.kz Zakon.kz-كە سىلتەمە جاساپ.

كەشكى ساعات جەتىلەر شاماسىندا “102” ارناسىنا ءبىر جىگىت تەلەفون سوعىپ، تاۋدا جۇرگەندە سايعا قۇلاپ كەتكەنىن، وزدىگىنەن شىعا الماي قالعانىن حابارلادى. جاس جىگىت دەرەۋ جبو وپەراتورىنا ءوزىنىڭ ورنالاسقان جەرىن جىبەرىپ، ۇيالى تەلەفونىنىڭ قۋاتى تاۋسىلعالى تۇرعانىن ايتتى.

"دابىلدى حابارعا ءبىرىنشى بولىپ ءبىزدىڭ ارىپتەسىمىز – پوليسەي ءانۋار قاشىبايەۆ جاۋاپ بەردى. ءبىر مينۋتتان كەيىن ارىپتەسىم، ۋچاسكەلىك اعا ينسپەكتور – دارحان سارى ەكەۋمىز دەر كەزىندە وقيعا ورنىنا جەتتىك. ىزدەۋدى باستادىق. قاراڭعى بولىپ كەتكەن كەز، تەك دىبىستارعا ءمان بەردىك. ءبىر كەزدە تومەننەن كومەك سۇراعان داۋىستى ەستىدىك. سول جەرگە جاقىن ماڭدا موپەد تۇردى. ەر ادام ابايسىزدا سايعا قۇلاپ، شىرشالاردىڭ بۇتاقتارىنان ۇستاپ قالعانىن ايتتى. جاس جىگىت ۇرەي ۇستىندە بولدى، قاتتى توڭىپ قالعان. ءبىز ونىڭ قاسىنا تومەنگە تۇستىك، جىلىتۋ ءۇشىن كيىمدەرىمىزدى ۇستىنە جاپتىق، ارنايى قۇتقارۋ قۇرالدارىنىڭ كومەگىمەن قۇلاعان ادامدى جوعارى قاراي كوتەرىپ الدىق. سودان كەيىن ونى ارى قاراي تەكسەرۋ ءۇشىن اۋرۋحاناعا جەتكىزدىك، – دەيدى 83ء-ۋپپ-نىڭ ۋچاسكەلىك ينسپەكتورى اسحات رىسبەكوۆ.

جابىرلەنۋشىنىڭ كۋرەر بولىپ جۇمىس ىستەيتىنى بەلگىلى بولدى. سول كۇنى كەشكە تاۋ اۋاسىمەن تىنىستاۋ ءۇشىن شاتقالعا شىققان. الايدا بۇل سەرۋەن قايعىلى جاعدايمەن اياقتالا جازدادى.