گرۋزيا سوڭعى جەتى كۇندە 100 مىڭ ادامعا شاققاندا ءبىر تاۋلىكتە كوروناۆيرۋس جۇقتىرۋ سانى بويىنشا الەمدە ءبىرىنشى ورىندا، ال ادام ءولىمى بويىنشا ءتورتىنشى ورىندا تۇر. بۇل دەرەكتەردى The New York Times كەلتىردى، دەپ حابارلايدى almaty-akshamy.kz قازاقپاراتقا سىلتەمە جاساپ.
باسىلىمنىڭ دەرەگىنە سايكەس، گرۋزيادا اۋرۋ جۇقتىرۋدىڭ ورتاشا تاۋلىكتىك كورسەتكىشى 3 758 ادامدى، ال قايتىس بولعاندار سانى 36 ادامدى قۇرايدى. گرۋزيا ءقازىر كوروناۆيرۋستىڭ ءتورتىنشى تولقىنىندا تۇر. سوڭعى 24 ساعاتتا ەلدە 5697 ادام اۋرۋعا شالدىعىپ، 54 ادام COVID-19-دان كوز جۇمدى. بۇل پاندەميا باستالعان ۋاقىتتىڭ ىشىندەگى رەكوردتىق كورسەتكىش.
دۇيسەنبى كۇنى بيلىك جاڭا شەكتەۋلەر ەنگىزىلەتىنىن جاريالادى. 10 تامىزدان باستاپ ەلدە تەك جابىق كەڭىستىكتە ەمەس، 5 ادام جينالاتىن اشىق اۋادا دا ماسكا تاعۋ مىندەتتەلدى. ۇيلەنۋ تويىنا، جەرلەۋ راسىمىنە، مەرەيتويلار مەن باسقا دا شارالارعا سالىنعان تىيىم قاتتى قاداعالانادى. سونداي-اق، تۇنگى ۋاقىتتا كلۋبتار مەن مەيرامحانالاردىڭ جۇمىسىنا رۇقسات ەتىلمەيدى.
ۆاكسينانىڭ تەك ءبىر دوزاسىن العاندار سانى 7 تامىزدا 664 997 ادامعا جەتتى. بۇل گرۋزيا حالقىنىڭ 17،8%-ىن عانا قۇرايدى. ەكى دوزاسىن دا 204 234 ازامات (5،3%) الدى.