2023 جىلى الماتىنىڭ بەلسەندى ۇزاق ءومىر ءسۇرۋ ورتالىقتارىندا قارت تۇرعىندارعا 645 مىڭنان استام ءتۇرلى قىزمەت كورسەتىلدى. بۇل تۋرالى وكق بريفينگىندە الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ مالىمدەدى، دەپ حابارلايدى almaty-akshamy.kz
مەگاپوليستە بارلىعى 10 بەلسەندى ۇزاق ءومىر ءسۇرۋ ورتالىعى جۇمىس ىستەيدى. وتكەن جىلى بەلسەندى ۇزاق ءومىر ءسۇرۋ مەملەكەتتىك ورتالىعىندا تىركەلگەن 2 245 زەينەتكەر 86،5 مىڭ قىزمەت العان.
اۋدان اكىمدىكتەرى جانىنان جۇمىس ىستەيتىن 9 بەلسەندى ۇزاق ءومىر ءسۇرۋ ورتالىعىندا 8 101 زەينەتكەر بوس ۋاقىتتارىن وتكىزدى، 559 مىڭنان استام قىزمەت الىندى.
«ورتالىقتاردىڭ قىزمەتى ەگدە جاستاعى ازاماتتاردىڭ ءومىر ءسۇرۋ ساپاسىن ارتتىرۋعا، ولاردىڭ اقىل-وي، شىعارماشىلىق، قوعامدىق قىزمەتكە بەلسەندى تارتىلۋىنا جانە ۇرپاقتار ساباقتاستىعىنا جاردەمدەسۋگە باعىتتالعان. مۇندا ساۋىقتىرۋ قىزمەتتەرى كورسەتىلەدى، ءتۇرلى باعىتتار بويىنشا كۋرستاردا وقىتۋ، بوس ۋاقىت وتكىزىلەدى، سونداي-اق قارت ادامدارمەن قارىم-قاتىناس جاساۋ جانە پسيحولوگيالىق جالعىزدىق ماسەلەلەرىن شەشۋ مۇمكىندىگى بەرىلەدى. تۇرعىنداردىڭ كوپتەگەن وتىنىشتەرىن ەسكەرە وتىرىپ، بوستاندىق جانە مەدەۋ اۋداندارىندا «بەلسەندى ۇزاق ءومىر ءسۇرۋ ورتالىعى» كمم جانىنان ەكى بولىمشە اشۋ ماسەلەسى قاراستىرىلۋدا»، - دەدى ب. جاۋباسوۆ.
سپيكەر از قامتىلعان جانە كوپ بالالى وتباسىلارعا كومەك كورسەتەتىن «باقىتتى وتباسى» ورتالىقتارىنىڭ قىزمەتىنە دە توقتالدى. قالادا بارلىعى 71،7 مىڭ ادامدى قامتيتىن 9 «باقىتتى وتباسى» ورتالىعى بار. بۇدان باسقا، «شىڭعا ورلەۋ» الەۋمەتتىك كلۋبىنىڭ 15 بولىمشەسى جۇمىس ىستەيدى، وندا از قامتىلعان وتباسىلاردان شىققان 1-4 سىنىپتا وقيتىن 3 661 بالا قوسىمشا ءبىلىم الدى. وسال ساناتتاعى 230 پەداگوگ (زەينەتكەرلەر، مۇگەدەكتىگى بار ادامدار، كوپ بالالى انالار) جوبانى ىسكە اسىرۋ ءۇشىن تۇراقتى نەگىزدە جۇمىسقا ورنالاستىرىلدى.
«رەسپۋبليكادا وتباسىلىق ساياساتتى ىسكە اسىرۋدىڭ باسىم باعىتتارىنا، ومىرلىك قيىن جاعدايعا تاپ بولعان الەۋمەتتىك وسال وتباسىلاردىڭ ءارتۇرلى ساناتتارىن تەڭگەرىمدى قولداۋ قاجەتتىلىگىنە سايكەس، 2024 جىلى كوپ بالالى، تولىق ەمەس، از قامتىلعان وتباسىلارعا، سونداي-اق، مۇگەدەك بالالارى بار جانە وتباسىلىق-تۇرمىستىق زورلىق-زومبىلىقتان زارداپ شەككەن وتباسىلارعا، ونىڭ ىشىندە 18 جاسقا دەيىنگى بالالارعا كەشەندى كونسۋلتاسيالىق قىزمەتتەر كورسەتۋ جونىندەگى فۋنكسيالاردى كەڭەيتە وتىرىپ، «باقىتتى وتباسى» ورتالىقتارىن وتباسىن قولداۋ ورتالىقتارىنا قايتا فورماتتاۋدى جوسپارلاپ وتىرمىز»، - دەپ تولىقتىردى سپيكەر.
قورىتىندىلاي كەلە، باسقارما باسشىسى باۋىرجان جاۋباسوۆ 70 مىڭ ادام قامتىلاتىن الەۋمەتتىك جوبالاردى ىسكە اسىرۋدىڭ جالعاساتىنىن حابارلادى.