مۇگەدەكتىگى بار ادامداردى الەۋمەتتىك قولداۋى مەن ولاردىڭ ءومىر ءسۇرۋ ساپاسىن ارتتىرۋ مەملەكەتتىك ساياساتتىڭ باستى باعىتتارىنىڭ ءبىرى بولىپ تابىلادى. بۇل تۋرالى وڭىرلىك كوممۋنيكاسيالار قىزمەتىنىڭ بريفينگىندە الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ مالىمدەدى، دەپ حابارلايدى almaty-akshamy.kz
ونىڭ ايتۋىنشا، الماتىدا مۇگەدەكتىگى بار 56،7 مىڭ ادام تۇرادى (I توپ - 5 813 ادام، II توپ – 22 904 ادام، III توپ. -18 856 ادام، 18 جاسقا دەيىنگى مۇگەدەك بالالار-9 112 ادام).
نەگىزىنەن، مۇگەدەكتىگى بار ادامداردى الەۋمەتتەندىرۋ دەنساۋلىعى جوق جانداردىڭ مۇمكىندىكتەرىن وتەيتىن تەحنيكالىق كومەكشى قۇرالدارمەن جانە وڭالتۋدىڭ الەۋمەتتىك قىزمەتتەرىمەن ۋاقتىلى جانە اتاۋلى قامتاماسىز ەتۋ جولىمەن جۇزەگە اسىرىلادى.
«2023 جىلعا 12،7 ملرد تەڭگە ءبولىندى. مۇگەدەكتىگى بار ادامداردى الەۋمەتتىك قولداۋعا بولىنەتىن قارجى قاراجاتىنىڭ كولەمى جىل سايىن ارتىپ كەلەدى (2020 جىلى – 4،6 ملرد تەڭگە، 2021 جىلى – 5،2 ملرد تەڭگە، 2022 جىلى – 7،9 ملرد تەڭگە)»، – دەدى باۋىرجان جاۋباسوۆ.
مۇگەدەكتىگى بار ادامدار تەحنيكالىق وڭالتۋ قۇرالدارىنا ءوز بەتىنشە تاپسىرىس بەرە الادى.
«2023 جىلى مۇگەدەكتىگى بار 39 774 ادام جەكە ابيليتاسيا جانە وڭالتۋ باعدارلاماسىنىڭ الەۋمەتتىك بولىگىنە سايكەس تەحنيكالىق قۇرالدارمەن جانە وڭالتۋ قىزمەتتەرىمەن قامتاماسىز ەتۋ ءۇشىن جۇگىندى، ونىڭ ىشىندە 35 779 ادام قاجەتتى وڭالتۋ قۇرالدارىمەن جانە قىزمەتتەرىمەن ءساتتى قامتاماسىز ەتىلدى، بۇل قامتىلعانداردىڭ 90% -ىن قۇرايدى. جوسپارلى كورسەتكىش ورىندالدى»، - دەپ ناقتىلادى سپيكەر.
وڭالتۋ قۇرالدارىمەن قامتاماسىز ەتۋ الەۋمەتتىك قىزمەتتەر پورتالى ارقىلى جۇزەگە اسىرىلادى. پورتالدا قاجەتتى قاراجات بولماعان جاعدايدا كورسەتىلەتىن قىزمەتتى الۋشىلاردىڭ مەملەكەتتىك ساتىپ الۋ ارقىلى بالامالى قامتاماسىز ەتۋدى تاڭداۋعا قۇقىعى بار.
الماتى قالاسىن دامىتۋدىڭ 2025 جىلعا دەيىنگى باعدارلاماسىنىڭ جول كارتاسىن جانە 2030 جىلعا دەيىنگى ورتا مەرزىمدى پەرسپەكتيۆالاردى ىسكە اسىرۋ شەڭبەرىندە «الماتىدا ينكليۋزيۆتى ورتا قۇرۋ» ءبولىمى بويىنشا مۇگەدەكتىگى بار ادامداردى مەملەكەتتىك ساتىپ الۋ ارقىلى جەكە تاپسىرىس بويىنشا يننوۆاسيالىق (قىمبات) تەحنيكالىق وڭالتۋ قۇرالدارىمەن قامتاماسىز ەتۋ جونىندە شارالار قابىلداندى.
«وڭالتۋدىڭ يننوۆاسيالىق تەحنيكالىق قۇرالدارىمەن 433 ادام (150 ادام جاڭا تەحنولوگيا بويىنشا پروتەزدىك-ورتوپەديالىق قۇرالدارمەن، 200 ادام كرەسلو-اربامەن، 76 ادام سويلەۋ پروسەسسورلارىمەن جانە 7 ادام سۇيەك وتكىزگىش ەستۋ اپپاراتتارىمەن) قامتاماسىز ەتىلدى. 2024 جىلى مۇگەدەكتىگى بار 288 ادامعا (1،4 ملرد تەڭگە) يننوۆاسيالىق وڭالتۋ قۇرالدارى ساتىپ الىنادى»، – دەپ اتاپ ءوتتى باسقارما باسشىسى.
مۇگەدەكتىگى بار ادامدارعا جانە ءجۇرىپ-تۇرۋى قيىن، مۇگەدەكتىگى بار بالالارعا قوسىمشا «ينۆاتاكسي» قىزمەتتەرى ۇسىنىلادى، ول 100 اۆتوكولىكپەن مەملەكەتتىك الەۋمەتتىك تاپسىرىس ارقىلى جۇزەگە اسىرىلادى.
الماتى قالاسىنىڭ اكىمى ەربولات دوسايەۆتىڭ تاپسىرماسى بويىنشا «Ten Qogam» مۇگەدەك ادامداردى الەۋمەتتىك قولداۋ ورتالىعى» الەۋمەتتىك جوباسىن ماسشتابتاۋ بويىنشا شارالار قابىلداندى. قالا اۋداندارىندا 8 ورتالىق اشىلدى، وندا 6 454 ادام قىزمەت الدى.
الماتىدا كرەسلو-اربالاردىڭ بولشەكتەرىن جوندەۋ جانە اۋىستىرۋ بويىنشا تەگىن ورتالىق جۇمىس ىستەيدى، وندا اربامەن جۇرەتىن 600 ادامعا قىزمەت كورسەتىلەدى.
قازىرگى زامانعى شىعارماشىلىق تاجىريبەلەردىڭ كوممۋنيكاسيالىق مۇمكىندىكتەرى ارقىلى مۇگەدەك ادامداردى الەۋمەتتەندىرۋدى جانە بەيىمدەۋدى قامتاماسىز ەتۋ، تەڭ قولجەتىمدىلىك جانە ينكليۋزيا نەگىزىندە ولاردىڭ قابىلەتتەرىن دامىتۋ ءۇشىن 2024 جىلى كۇنىنە 60 ادامدى قامتي وتىرىپ، «الەۋمەتتىك ينتەگراسيا ورتالىعى» الەۋمەتتىك جوباسىن ىسكە اسىرۋ جوسپارلانۋدا. جوبا بىرنەشە باعىتتى قامتيدى: ارت-تەراپيا، تەاتر تەراپياسى، بي تەراپياسى، كىتاپحاناتەراپياسى، مۋزىكالىق تەراپيا، سۋرەتتىڭ زاماناۋي تەحنولوگيالارى جانە وپەراتورلىق ونەردى مەڭگەرۋ تەراپياسى.
الماتىدا مۇگەدەكتىگى بار ادامدار ءۇشىن قولجەتىمدى جانە كەدەرگىسىز ورتا قۇرۋ بويىنشا جۇمىستار جوسپارلى تۇردە جۇرگىزىلۋدە.
سپيكەر سونداي-اق مۇگەدەك ادامدارعا، مۇگەدەك بالالارعا، زەينەتكەرلەرگە، قيىن ومىرلىك جاعدايعا تاپ بولعان ادامدارعا ستاسيونار، جارتىلاي ستاسيونار، ۇيدە قىزمەت كورسەتۋ جانە ۋاقىتشا بولۋ جاعدايلارىندا ارناۋلى الەۋمەتتىك قىزمەتتەردىڭ كەپىلدىك بەرىلگەن كولەمىن كورسەتەتىن ۆەدومستۆولىق باعىنىستى 10 مەديسينالىق-الەۋمەتتىك مەكەمەنىڭ قىزمەتى تۋرالى اتاپ ءوتتى.