2023 جىلى الماتىدا 1 407 ەتنيكالىق قازاق «قانداس» مارتەبەسىنە يە بولدى. 151 ادام مارتەبەسىن تاعى ءبىر جىلعا ۇزارتتى. بۇل تۋرالى وكق الاڭىندا وتكەن بريفينگ بارىسىندا الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ مالىمدەدى، دەپ حابارلايدى almaty-akshamy.kz
«باسقارما تاريحي وتانىنا كەلگەن ەتنيكالىق قازاقتارمەن «قانداس» مارتەبەسىن بەرۋ جانە ۇزارتۋ بويىنشا جۇمىس جۇرگىزۋدە. وتكەن جىلى 1 407 ەتنيكالىق قازاق قانداس مارتەبەسىن الدى، 151 ادام مارتەبەسىن تاعى ءبىر جىلعا ۇزارتتى»، - دەدى ب.جاۋباسوۆ.
سونداي-اق، وتباسىن بىرىكتىرۋ ماقساتىندا شەتەلدە تۇراتىن ەتنيكالىق قازاقتاردىڭ تۋىستارىن قازاقستانعا كوشىرۋ ءۇشىن 37 ەتنيكالىق قازاققا شاقىرۋ بەرىلدى.
سونداي-اق، سپيكەر كوشى-قون جۇمىسىنا قاتىستى ماسەلەلەردى قوزعادى. پانا ىزدەپ جۇرگەن ادامدارعا جانە تاياۋ شىعىستان قازاقستان مەن پالەستينانىڭ 127 ەۆاكۋاسيالانعان ازاماتىن تۋىستارىنا بەرۋ جونىندە كۋالىكتەر بەرىلدى.
«باسقارمانىڭ قىزمەتىنە شەتەلدىك بىلىكتى قىزمەتكەرلەرگە رۇقسات بەرۋ، ۇزارتۋ فۋنكسيالارى دا كىرەدى. 2023 جىلى جوعارى بىلىكتى شەتەلدىك مامانداردى تارتۋعا 1 242 رۇقسات بەرىلدى، جەرگىلىكتى بيۋدجەتكە 738 ملن تەڭگە كولەمىندە سالىق الىمى تولەندى»، - دەپ قورىتىندىلادى باسقارما باسشىسى ب.جاۋباسوۆ.