شاھارىمىزدىڭ الەۋمەتتىك قىزمەتتەر ۇيىندە قالالىق ارداگەرلەر كەڭەسى، الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسى، قالالىق جانە اۋداندىق «بەلسەندى ۇزاق ءومىر ءسۇرۋ» ورتالىقتارى وكىلدەرىنىڭ قاتىسۋىمەن ارنايى جيىن ءوتتى.
باسقوسۋدىڭ العاشقى ءسوز كەزەگىن العان قالالىق ارداگەرلەر كەڭەسىنىڭ ءتوراعاسى اقان بيجانوۆ قازىرگى تاڭدا الماتىدا «بەلسەندى ۇزاق ءومىر ءسۇرۋ» رەسپۋبليكالىق باعدارلاماسىنىڭ قالاي جۇزەگە اسىپ جاتقانى جايىندا بايانداپ بەردى. قالالىق ارداگەرلەر كەڭەسى ءتوراعاسىنىڭ ايتۋىنشا، ءدال قازىرگى تاڭدا قالامىزدىڭ بىرنەشە اۋدانىندا «بەلسەندى ۇزاق ءومىر ءسۇرۋ» ورتالىقتارىنىڭ جۇمىسى جاندانا باستاعان. سونىمەن قاتار، ورتالىقتاردا ارداگەرلەردى الەۋمەتتىك قولداۋعا باعىتتالعان شارالار كەشەنى جۇيەلى تۇردە جۇزەگە اسىرىلىپ جاتىر.
– «بەلسەندى ۇزاق ءومىر ءسۇرۋ» باعدارلاماسىنىڭ ماڭىزى زور. قوعامداعى كوپتەگەن ماسەلەلەردى قامتيدى. ماسەلەن، الەۋمەتتىك قامسىزداندىرۋ، بوس ۋاقىتتى ءتيىمدى ۇيىمداستىرۋ جانە تاعى باسقا ماسەلەلەردىڭ جۇيەلى جۇرگىزىلۋىنە مۇرىندىق بولىپ وتىر. بۇدان وزگە، قازىرگى كەزدە الەۋمەتتىك ماسەلەلەردى شەشۋ بويىنشا قالامىزدىڭ بيۋدجەتىنىڭ مولشەرى ۇلعايا تۇسۋدە. سونداي-اق، ارداگەرلەرىمىز بەلسەنە اتسالىساتىن «شىڭعا ورلەۋ» باعدارلاماسىنا دا قوسىمشا اقشالاي قاراجات بولىنۋدە، – دەپ اتاپ ءوتتى اقان قۇسايىن ۇلى.
سونىمەن قاتار، قالالىق ارداگەرلەر كەڭەسىنىڭ ءتوراعاسى بىرلەسكەن باسقوسۋدىڭ تاعى ءبىر ماڭىزدى مىندەتى – قولعا الىنىپ جاتقان جۇمىستاردىڭ جاي-كۇيىن تالداپ، اتالمىش باعدارلامانى ىسكە اسىرۋ بارىسىندا بولاشاقتا ناقتى جوسپارلار كەرەك ەكەنىن دە ناقتىلاپ بەردى. كەلەسى كەزەكتە قالالىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى نازيرا توعىزبايەۆا «بەلسەندى ۇزاق ءومىر ءسۇرۋ» ورتالىقتارىندا زەينەتكەرلەردى ق ر زاڭنامالىق جانە نورماتيۆتىك-قۇقىقتىق اكتىلەرىمەن تانىستىرىپ، قارجىلىق جانە كومپيۋتەرلىك ساۋاتتىلىق، بانكتىك جانە باسقا دا ماسەلەلەر بويىنشا ساباقتار وتكىزەتىنىن، ينتەرنەت پەن WhatsApp-تى قالاي پايدالانۋ كەرەكتىگىن ۇيرەتەتىنىن جەتكىزدى. قالامىزدا اشىلعان «بەلسەندى ۇزاق ءومىر ءسۇرۋ» ورتالىقتارىندا ۇيىرمەلەر مەن ءتۇرلى كلۋبتار جۇمىس جاسايدى. سونىمەن قاتار، حور، بي، ۆوكال، دومبىرا ۇيرەتۋ، كينو سۇيەرلەر كلۋبى، ساندىك-قولدانبالى شىعارماشىلىق، سۋرەت سالۋ، قولونەر، كەسكىندەمە، ءمۇسىن جانە گرافيكا باعىتىنا باۋليتىن ۇيىرمەلەر بار. بۇعان قوسا، زەينەتكەرلەردىڭ شەت تىلدەرىن ۇيرەنۋلەرىنە دە مۇمكىندىك جاسالعان. ءتىپتى، الەم مۇراجايلارىنا ۆيرتۋالدى تۇردە ساياحاتتار دا جاساۋعا بولادى.
وسىناۋ جۇمىستاردىڭ جۇيەلى تۇردە ىسكە اسۋىنا تەك قالالىق اكىمشىلىك قانا ەمەس، باسقا دا قۇرىلىمدىق سالالار مەن قالامىزدىڭ ارداگەرلەرى بەلسەندى تۇردە اتسالىسۋدا.
جيىن سوڭىندا ارنايى قاۋلى قابىلدانىپ، وندا 2023 جىلى قالامىزدىڭ ارداگەرلەر كەڭەسى ۇيىمدارى مەن « بەلسەندى ۇزاق ءومىر ءسۇرۋ» ورتالىقتارىنىڭ الداعى اتقاراتىن جۇمىستارىنىڭ ناقتى ماقساتتارى بەلگىلەندى.
«اlmaty-akshamۋ»، №4 (6297) 12 قاڭتار، 2023 جىل