نە بايقادىڭىز؟
اۋا رايىن بولجايتىن مامانداردىڭ پىكىرىنشە، الداعى كۇندەرى قالىڭ قار جاۋادى. كوكتايعاق بولادى. مۇندايدا، ارينە، ادامداردىڭ قاۋىپسىزدىگى ماڭىزدى.
«جۇمىستان قالاتىن بولدىق قوي...»
ءقازىر تۇستەن كەيىن وقيتىن تومەنگى سىنىپ وقۋشىلارىن مۇعالىمدەرى ەرتە قايتارىپ ءجۇر. سۋىقتا ايالدامادا تۇرىپ توڭىپ قالماسىن دەيدى. ال سولتۇستىك وبلىستاردا ءتىپتى باستاۋىش سىنىپ وقۋشىلارى ونلاين-وقۋعا كوشكەن دە بولار مىناداي اۋا رايىندا.
الگىندە اۋىلدان الماتىعا قاتىنايتىن اۆتوبۋستا كەلە جاتىرمىز. اۆتوبۋس جول بويىمەن اقىرىن ءجۇرىپ كەلەدى. ءبىر جولاۋشى ايەل:
– تەزىرەك جۇرسەڭىزشى، جۇمىستان قالاتىن بولدىق قوي، – دەپ اشۋ شاقىردى.
– مەن ءوز اۋانىممەن، ءوز ۋاقىتىممەن كەلە جاتىرمىن، بۇدان ارتىق جۇرە المايمىن، كورىپ تۇرسىزدار، جول تايعاق. جول اماندىعى، جولاۋشىلاردىڭ اماندىعى كەرەك، – دەدى جۇرگىزۋشى.
ءبىر كەزدە اۆتوبۋس جۇرگىزۋشىسىنە ديسپەچەر قىز حابارلاستى. داۋىسى بارىمىزگە ەستىلىپ تۇر.
– قايىرلى كۇن! الدىڭىزدا كەلە جاتقان «143» (اۆتوبۋس ءنومىرى بولار) سىنىپ قالدى، ءقازىر سوڭعى نۇكتەگە جەتكەن كەزدە، كەرى قايتا شىعارسىز. ارتىڭىزدان كەلە جاتقان اۆتوبۋس تا توقتاپ قالدى، – دەدى.
– جاقسى، قابىلداندى، – دەدى جۇرگىزۋشى. – انە، سىزدەر تەز جۇرمەدىڭ دەيسىزدەر، تاڭ اتپاي جاتىپ ەكى اۆتوبۋسىمىز سىنىپ قالىپتى جولدا. مىنا اۋا رايى وڭاي تيمەيىن دەپ تۇر قاي-قايسىسىمىزعا دا. قار تۇنىمەن جاۋدى.
اق قار، كوك مۇزدا...
كەشە كەشكە تەلەارنادان جول-كولىك ماماندارى سويلەپ جاتىر ەكەن. قۇلاق ءتۇردىم. «الەۋمەتتىك جەلىدە تاراپ ءجۇر» دەپ ءبىر ۆيدەونى كورەرمەن نازارىنا ۇسىندى. وندا رەسپۋبليكالىق ماڭىزى بار ۇلكەن جولدا «ارى قاراي جۇرۋگە بولمايدى، جول جابىق، قار باسىپ قالعان» دەگەن ءۇش پوليسەيدى تىڭداماي، جولعا شىققان ەر ادامدار «ەي، يتەرمە مەنى، جىبەر، وتكىز ءبىزدى» دەپ قوقاڭداپ تۇر. ال ءقازىر «اقىرى ونلاين وقۋداسىڭ عوي» دەپ كولىكتەرىنە بالا-شاعاسىن سالىپ الىپ جولعا شىعاتىندار دا قاۋىپسىزدىكتى ويلامايدى. «تاكسيستەر دە ءبىر كۇندە ەكى-ۇش رەيس جاساپ تاستاۋىمىز كەرەك دەپ جانتالاسىپ، جول قاۋىپسىزدىگىن ەسكەرمەيدى» دەپ شىرىلداپ تۇر مامان. ال وندايلاردىڭ تەمىر تۇلپارىنىڭ دوڭگەلەگى كۇرەجولدا سىرعاناپ، ەكىنشى كولىككە سوقتىعىسقاندا بارىپ وكىنىپ جاتاتىنىن كۇندەلىكتى ومىردە كورىپ ءجۇرمىز. اق قار، كوك مۇزدا جولعا شىعىپ، بالا-شاعاسىمەن ءبىر وتباسى تۇگەل وپات بولىپ جاتقان جاعدايلار دا از ەمەس.
اينالايىن، ازامات ەكەن!
وتكەندە «الماتى تازالىق» مەكەمەسىندە جۇمىس ىستەپ، كۇندىك ءناپاقاسىن تاۋىپ جۇرگەن كوشە تازالاۋشى ەڭبەك ادامدارىمەن سويلەسكەنىمدە، جۇمىستارىنىڭ، اسىرەسە، قىس مەزىلىندە اۋىر بولاتىنىن ايتىپ قالعان-دى. شىنىمەن دە، ءبىز ءالى جىلى كورپەنىڭ استىندا ۇيىقتاپ جاتقاندا، ولار تاڭ قاراڭعىلىعىنان تۇرىپ، مىناداي ايازدا قار كۇرەپ، جولعا تۇز، قۇم سەۋىپ جۇرەدى. ءبىزدىڭ تاڭەرتەڭ امان-ەسەن جۇمىسقا، ساباققا جەتۋىمىز ءۇشىن جاعداي جاساپ جۇرگەندەر.
ايتپاقشى، وتكەندە الەۋمەتتىك جەلىدە الماتىنىڭ ارباتىندا سول ماڭنان ءوتىپ بارا جاتقان جۇرگىنشى ءبىر قازاق جىگىتىنىڭ قىزعىلت سارى جيلەت كيگەن، قار كۇرەپ جاتقان ءبىر ايەلدىڭ قولىنداعى كۇرەگىن الىپ، قار كۇرەپ جۇرگەن ۆيدەوسى تاراپ، جۇرەگىمىزدى ءبىر تولقىتقانى بار-دى. اينالايىن-اي! اناسىنداي ادامنىڭ بەلى بۇگىلىپ، مىنا سۋىقتا قار كۇرەپ جۇرگەنىنە جانى اۋىرىپ كەتكەن بولار. الەمدى سونداي مەيىرىم، قايىرىم سىندى بيىك قاسيەتتەر ۇستاپ تۇر عوي نەگىزى. جانە دە ايەل-اناعا دەگەن قۇرمەت قانداي!
«اlmaty-akshamۋ»، №4 (6297) 12 قاڭتار، 2023 جىل