6 قازان كۇنى استانا قالاسىندا رەسپۋبليكالىق «زەردەلى» وقۋ ورتالىعى ءوزىنىڭ 10 جىلدىق مەرەيتويىن اتاپ ءوتتى. سالتاناتتى شارا بارىسىندا ورتالىقتىڭ نەگىزىن قالاعان اعايىندى ىرىسبەك جانە وجەت ءماۋىت ۇزدىك ۇستازدارعا پاتەر سەرتيفيكاتى مەن دۋبايعا دەمالىس جولداماسىن سىيعا تارتتى، دەپ حابارلايدى aqshamnews.kz
«زەردەلىنىڭ 10 جىلدىق مەرەيتويى ۇستازدار كۇنىمەن تۇسپا-تۇس كەلدى. وسىعان وراي، 7 مۇعالىمگە باسپانا الۋعا قولداۋ كورسەتۋدى شەشتىك. بۇعان دەيىن دە 25 ۇستازىمىزدىڭ ءۇيلى بولۋىنا كومەكتەسكەن ەدىك. بۇل ءۇردىس ءالى دە جالعاسىن تابادى. ۇستازدىق قىزمەتكە ءومىرىن ارناعان جاندار ءۇشىن قانداي قولداۋ جاساساق تا لايىقتى. سونىمەن قاتار، 15 ادامعا دۋبايعا دەمالىس جولداماسىن سىيلادىم. وتكەن وقۋ جىلىندا دا زەردەلىدە قىزمەت ەتكەن 100-گە جۋىق ۇستازىمىز وسى جولدامامەن دۋبايدا دەمالىپ قايتقان»، – دەدى ىرىسبەك ءماۋىت.
قازىرگى تاڭدا زەردەلى ورتالىعى ەلىمىزدىڭ 18 وبلىسىندا 41 وقۋ ورتالىعىمەن، 7 مەكتەبىمەن جانە 50-گە جۋىق بولىمشەسىمەن جۇمىس ىستەيدى. استانانىڭ وزىندە 500-گە جۋىق پەداگوگ قىزمەت اتقارادى.
«مەرەكەدە ۇستازدارعا ساپالى ءارى ادال ەڭبەكتەرى ءۇشىن اقشالاي سىياقى مەن سوڭعى ۇلگىدەگى ايفوندار تابىستادىق. پرەزيدەنتىمىز «پەداگوگ مارتەبەسىن كوتەرۋ – مەملەكەتتىك ساياساتتىڭ ماڭىزدى بولىگى» دەپ اتاپ وتكەندەي، ءبىز ۇستازدارعا قۇرمەت پەن ماتەريالدىق قولداۋدىڭ قاتار ءجۇرۋىن ماڭىزدى دەپ سانايمىز»، – دەپ قوستى كاسىپكەر-پەداگوگ.
مەرەكەلىك كەشكە ەلىمىزدىڭ مادەنيەت جانە ونەر قايراتكەرلەرى كەلىپ، ءان مەن جىردان شاشۋ شاشتى. قوناقتاردىڭ قاتارىندا ءداستۇرلى ءانشى ەرلان رىسقالي مەن اقىن قالقامان سارين بولدى.
كەرەك دەرەك
«زەردەلى» وقۋ ورتالىعى – دارىندى بالالارعا ارنالعان ءبىلىم بەرۋ ورتالىعى. سوڭعى 10 جىل ىشىندە ورتالىق ەلىمىزدىڭ ەڭ ءىرى ءبىلىم بەرۋ ورىندارىنىڭ بىرىنە اينالدى.