الماتى اكىمى ەربولات دوسايەۆ پەن TAV Airports Holding باس ديرەكتورى سەركان كاپتان الماتى حالىقارالىق اۋەجايىنىڭ اعىمداعى ماسەلەلەرى مەن ونى دامىتۋ جوسپارلارىن تالقىلادى. كەڭەستە جاڭا حالىقارالىق تەرمينالدىڭ ىسكە قوسىلۋىنان كەيىنگى اۋەجايداعى ماسەلەلەر، سونداي-اق ينفراقۇرىلىمدى جاقسارتۋ جانە قىزمەت كورسەتۋ ساپاسىن ارتتىرۋعا باعىتتالعان شارالار قاراستىرىلدى، دەپ حابارلايدى aqshamnews.kz
كەزدەسۋ بارىسىندا ەربولات دوسايەۆ جاڭا تەرمينالدىڭ جوسپارلانعان مەرزىمنەن ەكى اي بۇرىن، ياعني 2024 جىلدىڭ 1 ماۋسىمىندا اشىلعانىن، بۇل جولاۋشىلاردىڭ جايلىلىعىن ارتتىرىپ، قىزمەت كورسەتۋ دەڭگەيىن جاقسارتۋعا ءتيىس بولعانىن اتاپ ءوتتى. الايدا، اشىلعاننان كەيىن تەرمينالدىڭ درەناج جۇيەسىندەگى اقاۋلار، ەسكالاتورلاردىڭ دۇرىس جۇمىس ىستەمەۋى، جۇك بەرۋ كەزىندە كىدىرىستەر، قابىرعاداعى جارىقتار جانە باسقا دا كەمشىلىكتەر انىقتالعان.
قالا باسشىسى بۇل كەمشىلىكتەر جولاۋشىلاردىڭ نارازىلىعىن تۋعىزعانىن ايتىپ، جاعدايدى تۇزەتۋ ءۇشىن قابىلدانعان شارالاردى تالقىلاۋدى ۇسىندى.
TAV Airports Holding باس ديرەكتورى سەركان كاپتان اۋەجايدىڭ ءبىرقاتار قيىندىققا تاپ بولعانىن، ولاردى شەشۋ ءۇشىن كەشەندى ءتاسىل قاجەت ەكەنىن مالىمدەدى. ونىڭ ايتۋىنشا، جاڭا تەرمينالداعى انىقتالعان كەمشىلىكتەر تولىعىمەن جويىلعان. قازىرگى ۋاقىتتا درەناج جۇيەسىن قالپىنا كەلتىرۋ جانە ونى قالالىق جەلىلەرگە قوسۋ جۇمىستارى اياقتالىپ كەلەدى. سونداي-اق، ىشكى تەرمينالدى قايتا قۇرۋ – تىركەۋ ايماقتارىن، كۇتۋ زالدارىن جانە جۇك بەرۋ ايماقتارىن كەڭەيتۋ، تەلەتراپتاردى اۋىستىرۋ جۇمىستارى جۇرگىزىلۋدە.
سەركان كاپتان جولاۋشىلاردىڭ قاۋىپسىزدىگى مەن جايلىلىعىن ارتتىرۋعا باعىتتالعان ءبىرقاتار جوسپارلاردى دا اتاپ ءوتتى. ولاردىڭ ىشىندە سول جاق ۇشۋ-قونۋ جولاعىن تولىق قايتا قۇرۋ، پەررونداردى جانە مۇزعا قارسى الاڭدى جاڭارتۋ، اەرودروم جابدىقتارىن جاڭارتۋ، درەناج جۇيەسىندەگى ماسەلەلەردى شەشۋ سەكىلدى شارالار بار.
كەڭەستە كولىك ينفراقۇرىلىمىنداعى تۇيتكىلدەر دە قارالدى. اۋەجايداعى اۆتوتۇراق ورىندارى مەن كىرەبەرىس جولدارداعى قيىندىقتار بەلگىلى ءبىر كەدەرگىلەر تۋعىزادى. قاربالاس ۋاقىتتا اۋەجايعا كىرۋ 45 مينۋتقا دەيىن سوزىلۋى مۇمكىن، بۇل قولدانىستاعى جول ينفراقۇرىلىمىن قايتا قاراۋدى تالاپ ەتەدى. قازىرگى ۋاقىتتا اۋەجايدا 551 ورىندىق 3 تۇراق ايماعى اشىلعان. بۇل ماسەلەنى شەشۋ ءۇشىن الداعى ۋاقىتتا ينۆەستور 1000 ورىندىق كوپقاباتتى اۆتوتۇراق سالۋدى جوسپارلاپ وتىر.
كەزدەسۋ سوڭىندا تاراپتار الماتى حالىقارالىق اۋەجايىنىڭ ساپالى جۇمىسىن قامتاماسىز ەتۋ ءۇشىن تىعىز ىنتىماقتاستىققا جانە قاجەتتى ءىس-شارالاردى جۇزەگە اسىرۋعا دايىن ەكەندىكتەرىن مالىمدەدى.