الاش قايراتكەرى، قازاق ادەبيەتىندەگى تۇڭعىش رومان سانالاتىن «باقىتسىز جامال» جانە «ويان، قازاق!» سىندى سۇيەكتى شىعارمالاردىڭ اۆتورى ءمىرجاقىپ دۋلات ۇلىنىڭ سوقتىقپالى-سوقپاقتى عۇمىرى تۋرالى فيلم تۇسىرگەن رەجيسسەر مۇرات ەسجان مەن وڭتۇستىكتەن سولتۇستىككە كوشتى ۇيىمداستىرىپ جۇرگەن قوعام بەلسەندىسى بۋراحان داحانعا كاسىپكەر كولىك تارتۋ ەتتى، دەپ حابارلايدى Almaty-akshamy.kz.
«قازاق رۋحانياتىنىڭ التىن قورىنا وراسان قازىنا قوسقان، الاش قايراتكەرلەرىنىڭ ەل ءۇشىن اتقارعان ەرەن ەڭبەگىن قايتا جاڭعىرتىپ، ساپالى فيلم ءتۇسىرىپ كورەرمەنگە ساۋلەلى دۇنيە ۇسىنعان مۇرات ەسجان باۋىرىمىزعا تەمىر تۇلپار تارتۋ ەتۋدى ءجون سانادىق. ەلىمىزدىڭ وڭتۇستىگىنەن تەرىسكەيگە كوشتى باستاپ، ازاماتتاردىڭ سولتۇستىكتەگى اۋىلدارعا كوشىپ بارۋىنا قوزعاۋ سالىپ جۇرگەن قوعام بەلسەندىسى بۋراحان داحاننىڭ ەڭبەگى قانداي قۇرمەتكە دە لايىق. ازاماتتار الداعى ۋاقىتتا جاڭا كولىكپەن ءجۇرىپ، ەلىمىزدىڭ وركەندەۋىنە ۇلەسىن قوسا بەرۋىنە تىلەۋلەسپىز»، دەدى كاسىپكەر سىرىمبەك تاۋ.
«جۇك سالعىشتىڭ ەسىگىن اشۋ ءۇشىن كولىكتىڭ ىشىنەن ەڭبەكتەپ جەتۋشى ەدىم، تەرەزەسى اشىلسا جابىلمايتىن سالدىرلاق كولىگىمە ەش وكپە جوق. سالدىرلاسا دا وسى ماشينەمەن ءجۇرىپ تە «احمەت. ۇلت ۇستازى»، «ويان، قازاق!» سەريالدارىن تۇسىردىك. سىرىمبەك تاۋ مىرزا سالتاناتتى شاراعا شاقىرعاندا ويدا تۇك جوق كەلىپ، كولىگىمدى قىمبات ماشينەلەردىڭ قاسىنا قاڭتارۋعا ۇيالىپ، قالتارىستاۋ جەرگە قالدىرىپ كەتىپ ەدىم. ويلاماعان جەردەن قۇرمەت كورسەتكەنى، توسىن سىي بولدى راسىندا»، دەدى مۇرات نۇراكىم ۇلى.