ەلىمىزگە تانىمال عالىم، تاريح عىلىمدارىنىڭ دوكتورى ابدەش تولەۋبايەۆ ومىردەن وزدى، دەپ حابارلايدى Almaty-akshamy.kz.
بۇل تۋرالى ءوزىنىڭ Instagram پاراقشاسىندا دانيال احمەتوۆ جازدى.
«بۇگىن مەنىڭ دوسىم، ەلىمىزدىڭ بەلگىلى عالىمى، تاريح عىلىمدارىنىڭ دوكتورى، پروفەسسور ابدەش تولەۋبايەۆ ومىردەن وزدى. ابدەش تاشكەن ۇلى تاجىريبەلى دالا زەرتتەۋشىسى جانە ەكسپەديسيالىق جۇمىستاردىڭ تاماشا ۇيىمداستىرۋشىسى بولا ءبىلدى. ارحەولوگيالىق ەسكەرتكىشتەردى انىقتاۋ جانە زەرتتەۋ بويىنشا بەلسەندى قىزمەت اتقاردى. عىلىمي كىتاپتار مەن ماقالالار جازىپ، ارتىنان زور مۇرا قالتىردى. سوڭعى 20 جىلدا ول شىعىس قازاقستاننىڭ تارباعاتاي، ساۋىر جانە شىڭعىستاي تاۋ بوكتەرىندەگى ارحەولوگيالىق ەسكەرتكىشتەردى ءساتتى زەرتتەدى. ابدەش تولەۋبايەۆ الەمدىك دەڭگەيدەگى جاڭالىقتارعا يەلىك ەتەدى. ول التىننان مىڭداعان ەرەكشە ارتەفاكتىلەردى – ەرتە ساق داۋىرىندەگى ەجەلگى زەرگەرلەردىڭ قولدانبالى ونەرىن جينادى. مەن ابدەش تاشكەن ۇلى تولەۋبايەۆتىڭ تۋىستارى مەن جاقىندارىنا كوڭىل ايتامىن. ونىڭ ارداقتى ەسىمى ماڭگىلىك جادىمىزدا ساقتالادى»، - دەپ جازدى، دانيال احمەتوۆ.