قازاقستاننىڭ ەڭبەك سىڭىرگەن دارىگەرى دۇنيەدەن ءوتتى
بەلگىلى عالىم، قازاقستان رەسپۋبليكاسىنا ەڭبەك سىڭىرگەن وفتالمولوگ دارىگەر، جازۋشى عابيدەن ءمۇستافيننىڭ قىزى، پروفەسسور جانار عابيدەن قىزى مۇستافينا ومىردەن ءوتتى، دەپ حابارلايدى Almaty-akshamy.kz
بۇل تۋرالى اسفەندياروۆ اتىنداعى قازاق ۇلتتىق مەديسينا ۋنيۆەرسيتەتى حابارلادى.
«بەلگىلى عالىم، قازاقستاننىڭ ەڭبەك سىڭىرگەن دارىگەرى، پروفەسسور جانار عابيدەن قىزى مۇستافينا 86 جاسىندا ومىردەن وزدى. ول مەديسينا مەن عىلىمعا بار كۇش-جىگەرىن ارنادى، عىلىمعا، قازۇمۋ-دە وقۋ-تاربيە ءىسىن قالىپتاستىرۋعا زور ۇلەس قوستى. ونىڭ ەڭبەگى رەسپۋبليكادا جانە ودان تىس جەرلەردە لايىقتى بەدەل مەن قۇرمەتكە يە بولدى. حالىق جانە مەملەكەت الدىنداعى قىزمەتى «پاراسات»، «قۇرمەت بەلگىسى» وردەندەرىمەن ماراپاتتالىپ، «قازاقستان رەسپۋبليكاسىنىڭ ەڭبەك سىڭىرگەن دارىگەرى» اتاعى بەرىلگەن.
اسفەندياروۆ اتىنداعى قازۇمۋ وقىتۋشىلارى، ستۋدەنتتەرى مەن قىزمەتكەرلەرى مارقۇمنىڭ تۋىستارىنىڭ قايعىسىنا ورتاقتاسىپ، وتباسى مەن جاقىندارىنا كوڭىل ايتادى. جانار عابيدەن قىزىنىڭ جارقىن بەينەسى، ونىڭ جىگەرى، مەيىرىمدىلىگى، ۇقىپتىلىعى، پاراساتتىلىعى مەن جان دۇنيەسى ونى تانىپ، بىرگە جۇمىس ىستەۋ باقىتىنا يە بولعان جانداردىڭ جادىندا ماڭگى ساقتالادى»، - دەلىنگەن قازۇمۋ حابارلاماسىندا.