2022 جىلدىڭ ءبىرىنشى جارتىجىلدىعىندا 9 ملن قازاقستاندىقتى ريەۆاكسينالاۋ قاجەت — ا. مامين
ق ر پرەمەر-مينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا ەلدەگى سانيتارلىق-ەپيدەميولوگيالىق جاعداي قارالدى، دەپ حابارلايدى اlmaty-akshamy.kz
دەنساۋلىق ساقتاۋ ءمينيسترىنىڭ مىندەتىن اتقارۋشى جاندوس بۇركىتبايەۆ ەلدەگى سانيتارلىق-ەپيدەميولوگيالىق جاعدايدىڭ تۇراقتى ەكەنىن باياندادى. ينفەكسيالىق جانە رەانيماسيالىق توسەكتەردىڭ جۇكتەمەسى 17% قۇرايدى. كوروناۆيرۋس ينفەكسياسىمەن اۋرۋحاناعا جاتقىزۋ جانە اۋىر جاعدايلار سانى ايتارلىقتاي ازايدى.
قازىرگى تاڭدا كوروناۆيرۋس ينفەكسياسىنىڭ تارالۋ قارقىنى بويىنشا وڭىرلەردىڭ كوبىسى (15) جانە جالپى قازاقستان رەسپۋبليكاسى «جاسىل ايماقتا» ورنالاسقان. نۇر-سۇلتان قالاسى مەن سولتۇستىك قازاقستان وبلىسى «سارى ايماقتا» تۇر.
بۇگىنگى تاڭدا 9 ملن-نان استام ادام ۆاكسينانىڭ ءبىرىنشى كومپونەنتىن الدى – بۇل ەرەسەك ادامداردىڭ 80%-عا جۋىعى، 8،5 ملن-عا جۋىق ادام نەمەسە ەرەسەك ادامداردىڭ 75%-ى ەكىنشى كومپونەنتىن الدى. 242 مىڭ ءجاسوسپىرىم ۆاكسينانىڭ ءى كومپونەنتىن الدى، II كومپونەنتىن – شامامەن 90 مىڭى.
ريەۆاكسيناسيادان 450 مىڭ ادام ءوتتى. سونىمەن قاتار الەمدە سىرقاتتانۋشىلىقتىڭ ءوسۋىن ەسكەرە وتىرىپ، ۇكىمەت باسشىسى سانيتاريالىق-ەپيدەميولوگيالىق تالاپتاردى، ونىڭ ىشىندە ءۇي-جايلار مەن قوعامدىق كولىكتەردە ماسكا تاعۋ رەجيمىن، سونداي-اق ادامدار كوپ جينالاتىن ورىنداردا الەۋمەتتىك قاشىقتىقتى ساقتاۋدىڭ قاتاڭ مىندەتتىلىگىنە ەرەكشە نازار اۋداردى.
پرەمەر-مينيستر ءتيىستى ءاقپاراتتىق-تۇسىندىرۋ جۇمىستارىن جانداندىرىپ، حالىقتى جاپپاي ريەۆاكسيناسيالاۋ قارقىنىن ارتتىرۋدى تاپسىردى.
«جاپپاي ريەۆاكسينالاۋ جۇمىستارىن كۇشەيتۋ قاجەت. 2022 جىلدىڭ ءبىرىنشى جارتىجىلدىعىندا شامامەن 9 ملن ادامدى ريەۆاكسينالاۋ قاجەت»، — دەدى ا. مامين.
ۆاكسينانىڭ ەكىنشى كومپونەنتىن العان ساتتەن باستاپ 6 اي ۋاقىت وتكەن ازاماتتار بۇعان دەيىن سالىنعان ۆاكسينانىڭ تۇرىنە بايلانىستى قايتا ۆاكسينا الادى.