بەلگيا ۇكىمەتى روجدەستۆولىق مەرەكەلەر قارساڭىندا سانيتارلىق قاۋىپسىزدىكتىڭ قوسىمشا شارالارىن ەنگىزۋدە
وتىرىس بولعان كۇنى ەلدىڭ پرەمەر-مينيسترى الەكساندر دە كروو COVID-19 ۆيرۋسىنا قارسى ۆاكسينانىڭ ءۇشىنشى دوزاسىن العانىن جاريالادى، دەپ حابارلايدى Almaty-akshamy.kz سoronavirus2020.kz-كە سىلتەمە جاساپ
«ەلىمىزدە كوروناۆيرۋستىڭ «دەلتا» شتامىمەن كۇرەس جۇرگىزۋگە باعىتتالعان شارالار كەشەنىنىڭ ىسكە قوسىلعانىنا ءۇش اپتا بولدى. ءبىز ول شارالاردىڭ راسىمەن دە كومەكتەسىپ وتىرعانىن كورىپ وتىرمىز: ينفەكسيا جۇقتىرۋ جاعدايلارى ازايۋدا»، - دەدى باسپا ءسوز كونفەرەنسياسىندا ا.كروو.
«ءبىراق، بۇل ساندارعا قاراماستان، الاڭداۋعا ءالى دە سەبەپ بار ەكەنى انىق: ۆيرۋستىڭ "وميكرون" نۇسقاسى جايلى ەستىپ جۇرگەنىمىز جاقسى جاڭالىق ەمەس»، - دەپ قوستى ول.
ساراپشىلاردىڭ باعالاۋىنشا، ۆيرۋستىڭ بۇل نۇسقاسى كوپ ۇزاماي بەلگيادا باسىم بولادى.
«ءبىز بۇرىنعىدان قىراعى بولۋىمىز كەرەك ەكەنى ءسوزسىز»، - دەپ ەسكەرتتى بەلگيالىق پرەمەر.
ا.كروونىڭ ايتۋىنشا، قازىرگى جاعدايدا «بۋستەرلىك» ەكپە سالدىرتۋ وتە ماڭىزدى.
«ءوز باسىم بۇگىن وزىمە ەكپە سالدىرتتىم»، - دەپ قوستى ا.كروو.
2021 جىلدىڭ 26 جەلتوقسانىنان باستاپ عيمارات ىشىندە ءىس-شارالاردى وتكىزۋگە تىيىم سالىنادى. كينوتەاتر، تەاتر جانە كونسەرت زالدارى ءوز جۇمىسىن توقتاتادى. كىتاپحانالار، مۇراجايلار جانە سپورتتىق شارالار بۇرىنعىداي جۇمىس ىستەيدى. كادىمگى باسسەيندەر اشىق بولادى، ءبىراق ويىن-ساۋىق باسسەيندەرى (اكۆاپارك) جابىلۋى ءتيىس. كوشەدە پالاتكالار ىشىندە وتكىزىلەتىن ءىس-شارالار، سونىڭ ىشىندە روجدەستۆولىق جارمەڭكەلەر مەن «قىسقى كەنتتتەر»، مادەني ءىس-شارالار، جينالىستار توقتاتىلادى.
بۇدان باسقا، 100-دەن استام ادامدى جينايتىن شارالار ءۇشىن جەكە كىرۋ جانە شىعۋ ەسىكتەرى قاراستىرىلعان ءبىرجاقتى قوزعالىس كەستەسى قۇرىلۋى ءتيىس. دۇكەننەن ءبىر ۋاقىتتا زات ساتىپ الۋعا 10 شارشى مەترگە ءبىر ادام كىرگىزىلەتىن بولادى. كاسىبي جانە اۋەسقوي سپورتتىق ويىندار (فۋتبول ماچتارى، ۆەلوكروسس) توقتاتىلادى. بەلگيادا قاشىقتان جۇمىس ىستەۋ ەرەجەلەرى بۇرىنعىداي قالماق: ەل ازاماتتارى جۇمىسىن اپتاسىنا ءتورت كۇن ۇيدەن اتقارادى.
«بۇل – دەنساۋلىق ساقتا جۇيەسىنە سالماق تۇسىرمەۋ، مەكتەپتەردىڭ قىسقى دەمالىستان كەيىن 10 قاڭتاردا اشىلۋىن قامتاماسىز ەتۋگە باعىتتالعان شارالار»، - دەپ اتاپ ءوتتى ا.كروو.
پرەمەر-مينيستر بۇل شارالاردىڭ بەلگيالىقتار ءۇشىن اۋىر ەكەنىن قوسىپ ءوتتى.
«بارلىعىمىز ءبىر جىل كۇش سالۋدان كەيىن روجدەستۆونى باسقاشا وتكىزەتىنىمىزدەن ۇمىتتەندىك. الايدا ءبىر جىل بۇرىن بارلىق بارلار مەن دۇكەندەر جابىلدى، شاشتارازدار جۇمىسىن توقتاتتى. ءبىر-بىرىمىزدى كورمەي كەتتىك. بيىل دا وسىلاي بولۋى مۇمكىن. قاۋىپسىزدىك شارالارىن ساقتاۋدى وتىنەمىز: قوناقتار سانىن شەكتەپ، دەنساۋلىعىڭىزدى كۇتىڭىزدەر»، - دەپ ۇندەدى ا.كروو.
ارنۇر راحىمبەكوۆ