بەلگيادا بيىل قىركۇيەكتەن باستاپ كارانتين جەڭىلدەتىلمەك.
بەلگيادا ۆاكسينالاۋ ناۋقانى قارقىندى ءجۇرىپ جاتىر. بۇل ءوز كەزەگىندە ەل بيلىگىنە كوروناۆيرۋسپەن بايلانىستى جاريالانعان كارانتين تالاپتارىن جەڭىلدەتۋگە مۇمكىندىك جاساپ وتىر، دەپ حابارلايدى Almaty-akshamy.kz قازاقپارات-قا سىلتەمە جاساپ.
«وسى ۋاقىتتا 7 ملن 796 مىڭ بەلگيالىق كوروناۆيرۋسقا قارسى ۆاكسينا الدى. بۇل - ەل حالقىنىڭ جاسى 18-دەن اسقان تۇرعىندارىنىڭ 80 پايىزى. «بۇگىنگى تاڭدا ەرەسەك 10 ادامنىڭ سەگىزى ۆاكسينا العان. وسىلايشا ءبىز «جازعى جوسپاردى» اسىرا ورىندادىق جانە بيىلعى جىلدىڭ 1 قىركۇيەگىنەن باستاپ بوستاندىققا ماڭىزدى قادام جاسايمىز»، - دەدى بەلگيانىڭ پرەمەر-مينيسترى الەكساندر دە كروو.
ەل ۇكىمەتىنىڭ جانىنداعى كونسۋلتاتيۆتىك كوميتەتتىڭ (ساراپشىلار) كەزەكتى وتىرىسىندا 1 قىركۇيەكتەن باستاپ تومەندەگىدەي تالاپتار ەنگىزىلەتىن بولادى:
- كافە مەن مەيرامحانالاردا سانيتارلىق تالاپتار جەڭىلدەتىلەدى. تەك زالدا جۇرگەندە عانا (دارەتحاناعا بارعاندا، ۇستەلدەن ۇستەلگە اۋىسقاندا، ت.س.س.) بەتپەردە تاعۋ مىندەتتى. وزگە شەكتەۋلەردىڭ بارلىعى الىندى. بۇعان قوسا قوعامدىق تاماقتانۋ ورىندارىنىڭ جۇمىس ۋاقىتى كارانتين تالاپتارىمەن رەتتەلمەيدى؛ - تۇندە ىستەيتىن دۇكەندەردىڭ جۇمىس ۋاقىتىنا شەكتەۋ قويىلمايدى؛ - وتباسىلىق شارالارعا كەلەتىن ادامدار سانىنا شەكتەۋ جوق؛ - بەلگيالىقتار ەندى ۇيىنە قانشا ادام جيناسا دا وزدەرى بىلەدى. - فلاندريادا ەندى قاشىقتان جۇمىس ىستەۋ ۇسىنىلمايدى، ال بريۋسسەلدە بۇل ۇسىنىس ءالى كۇشىندە؛ - 1 قازاننان باستاپ تۇنگى كلۋبتار جۇمىس ىستەي بەرەدى؛ - تۇرعىندار مىندەتتى تۇردە اراقاشىقتىقتى ساقتاپ ماسكا تاعۋى ءتيىس قوعامدىق ورىندارداعى (قوعامدىق كولىك، ستانسيالار، دۇكەندەر، كىتاپحانالار، سوت، ءدىني ۇيىمدار) سانيتارلىق نورمالار ساقتالادى.
سونداي-اق بەلگيا پرەمەر-مينيسترى ەلدىڭ بارلىق وڭىرلەرىنىڭ اكىمشىلىكتەرىن حالىق سانىنىڭ كەمىندە 70 پايىزىنىڭ ۆاكسينا الۋىن قامتاماسىز ەتۋگە شاقىردى.
«ادامداردى نەعۇرلىم كوبىرەك ۆاكسينالاۋ ءۇشىن ماقساتتى شارالار قولدانىلادى»، - دەدى ا.كروو.