الماتىدا كاسىپورىن جۇمىسشىلارىنىڭ 76 پايىزى ۆاكسينانىڭ ءبىرىنشى دوزاسىن العان.
كاسىپكەرلىك جانە ينۆەستيسيالار باسقارماسىنىڭ باسشىسى ەركەبۇلان ورازالين الماتىدا كاسىپورىن جۇمىسشىلارىنىڭ 76 پايىزى ەكپەنىڭ 1-كومپونەنتىن العانىن ايتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.
«قالامىزدا 123 جارىم مىڭ كاسىپورىندار 775 مىڭعا جۋىق جۇمىسكەرلەرىمەن ۆاكسينالاۋعا تيەسىلى. سونىڭ ىشىندە مەدوتۆودتى العانداردى ەسەپتەمەگەننىڭ وزىندە، 695 مىڭى ۆاكسينا الۋى ءتيىس. بۇگىنگى تاڭدا 528 مىڭعا جۋىق ادام ۆاكسينانىڭ ءبىرىنشى دوزاسىن العان»، – دەدى قالالىق كاسىپكەرلىك جانە ينۆەستيسيالار باسقارماسىنىڭ باسشىسى ەركەبۇلان ورازالين.
سونىمەن قاتار، جىل باسىنان بەرى الماتىنىڭ وڭدەۋ ونەركاسىبى سالاسى ايتارلىقتاي دامىعان. 7 اي ىشىندە 23،3 پايىزعا دەيىن ءوسىم بايقالىپتى. ودان بولەك، قاعاز جانە قاعاز ونىمدەرىنىڭ ءوندىرىسى 29،9 پايىزعا، قۇرىلىس ماتەريالدارى 16،5 دايىن مەتالل بۇيىمدارى 56 پايىزعا دەيىن وسكەن ەكەن.
«وزدەرىڭىز بىلەسىزدەر، وتكەن جىلى يندۋستريالدى ايماقتا حيۋنداي زاۋىتى اشىلعان بولاتىن. سول جىلى 6،5 مىڭنان استام اۆتوكولىك شىعارىلدى. بيىل دا قاڭتار-شىلدە ايلارىندا 12،3 مىڭنان استام اۆتوكولىك شىعارىلعان بولاتىن. ناتيجەسىندە ماشينا جاساۋ سالاسىندا 4،8 ەسەگە ءوستى»، – دەدى قالالىق كاسىپكەرلىك جانە ينۆەستيسيالار باسقارماسىنىڭ باسشىسى ەركەبۇلان ورازالين.