الماتىدا وقۋشىلارعا مەكتەپكە قاجەتتى جابدىقتار بەرىلدى

تاۋەلسىزدىكتىڭ 30 جىلدىق مەرەيتويى قارساڭىندا الماتىدا رەسپۋبليكالىق «يگى ىستەر» جانە «مەكتەپكە جول» مارافوندارى ءجۇرىپ جاتىر. 

مارافوندار اياسىندا ناۋرىزباي اۋدانىنىڭ اكىمدىگى «قۋانىش سىيلا» اكسياسىن وتكىزدى. يگى شارا بارىسىندا  30 كوپ بالالى جانە از قامتىلعان وتباسى مەكتەپكە جابدىقتالىپ، بۇلدىرشىندەرگە فورما، سومكە، سپورتتىق زاتتار، وقۋ قۇرالدارى جانە تاتتىلەر تارتۋ ەتىلدى، دەپ حابارلايدى Almaty-akshamy.kz Almaty.tv-گە سىلتەمە جاساپ.

«ناۋرىزباي اكىمدىگىنە كوپ راقمەت. ءبىز مىنانداي كومەكتى ءبىرىنشى رەت الىپ جاتىرمىز. ءبىراز جاقسى زات الىپ كەلىپسىزدەر، بۇل دا كومەك بىزگە. سول ءۇشىن قۋانىشتىمىز، راقمەت»، – دەدى ناۋرىزباي اۋدانىنىڭ تۇرعىنى ءاليما قوجاعۇلوۆا.

ءبىر ەرەكشەلىگى، بيىل اۋداندىق اكىمدىكتە قىزمەت ىستەيتىن جاس ماماندار 1 ميلليون تەڭگە قاراجات جيناپ، يگى شارانى ءوز كۇشىمەن وتكىزگەن. قايىرىمدىلىق اكسياسى 26 تامىزعا دەيىن جالعاساتىن  بولادى. جالپى، جىل باسىنان بەرى اۋداندا 36 اكسيا وتكەن. ونى ۇيىمداستىرۋشىلار جىل سوڭىنا دەيىن تاعى 70 شارا وتكىزۋدى جوسپارداپ وتىر.

«بۇرىن اكىمدىك تاراپىنان اۋدانداعى مەسەناتتاردى، دەمەۋشىلەردى ۇيىمداستىرىپ،  اۋدانداعى از قامتىلعان وتباسىنىڭ بالالارىنا دەمەۋشىلەردىڭ قولداۋىمەن وسىنداي شارالار اتقارىلعان. ال، جاس مامانداردىڭ ۇيىمداستىرۋىمەن بۇل ءبىرىنشى رەت وتكىزىلىپ وتىر»، – دەدى ناۋرىزباي اۋدانىنىڭ مادەنيەت جانە تىلدەردى دامىتۋ ءبولىمىنىڭ باس مامانى فاريزا ەسكەندىروۆا.