اباي اتىنداعى قازاق ۇلتتىق وپەرا جانە بالەت تەاترى شاڭىراعىندا «قازاق بالەتىنە 89 جىل» ارت-البومىنىڭ تانىستىرىلىمى ءوتتى. ادەمى كومكەرىلگەن البومعا ەلىمىزدىڭ كاسىبي حورەوگرافيالىق ونەرى ايدىنىندا 90 جىل بويىنا قويىلعان ۇلتتىق سپەكتاكلدەردىڭ بۇكىل تاريحى قۇنداقتالعان.
باس-اياعى ءبىر جىلدا جيناقتالعان ارت-البومعا ەلىمىزدىڭ بارلىق تەاترى مەن بي ترۋپپالارىنىڭ بۇكىل ۇلتتىق سپەكتاكلدەرىندەگى كورىنىستەرىن بەينەلەيتىن 65 اۆتورلىق سۋرەت-يلليۋستراسيا ەنگەن. ءيا، مۇراجاي، تەاتر جانە مۇراعاتتاردان الىنعان سيرەك كەزدەسەتىن فوتوسۋرەتتەر مەن ماتىندەر نەگىزىندە جاسالعان ءتۇرلى-تۇستى كىتاپ ونەرسۇيەر قاۋىمدى باۋراپ الارى ءسوزسىز. ونىڭ كىتاپ بولىپ قاتتالىپ شىعۋىنا Qazaq Ballet Creative Lab-تىڭ جانە نۇرسۇلتان نازاربايەۆ قورى قولداۋ كورسەتكەن.
– مەن بىلتىر سانكت-پەتەربۋرگتەگى مەملەكەتتىك ۋنيۆەرسيتەتتىڭ ماگيستراتۋراسىن ءبىتىردىم. وندا عىلىمي جۇمىسىمنىڭ ءبىر بولىگى رەتىندە قازاقستاننىڭ ۇلتتىق بالەتتەرىن زەرتتەگەن بولاتىنمىن. ماگيسترلىك ديسسەرتاسيانى جازۋ بارىسىندا ەلىمىزدىڭ ۇلتتىق حورەوگرافيالىق ونەرىنىڭ دامۋىن تەرەڭىرەك ءتۇسىنۋ ءۇشىن ءتۇرلى دەرەككوزدەرگە جۇگىندىم. سوندا قولعا ىلىنگەن ادەبيەتتەردە قازاق بالەتى تۋرالى يلليۋستراسيالىق بەينە، فوتوماتەريالداردىڭ جەتكىلىكسىزدىگىن بايقادىم. سوندىقتان كوپ دۇنيەنى ەلەستەتۋگە تۋرا كەلدى. وسى جوبانى جۇزەگە اسىرۋدىڭ ارقاسىندا قازاق بالەتىنىڭ باي تاريحىن جاڭعىرتۋعا مۇمكىندىك تۋدى. ءبىز قازاق مۋزىكالىق-حورەوگرافيالىق ونەرىن ۆيزۋالدى كەسكىندەمە جانە حورەوگرافيا ارقىلى ساقتاپ، تانىمال ەتۋدى ماقسات ەتتىك. البوم جۇمىسىنا وتاندىق ونەر قايراتكەرلەرى – سۋرەتشى جاننات بايمۇحانوۆا مەن ديزاينەر گۋزەل نۇرىمبەتوۆا دا اتسالىستى، – دەيدى «قازاق بالەتىنە 89 جىل» ارت-البومىنىڭ جەتەكشىسى توعجان ءمولدالىم.
رۋحاني، مادەني ءىس-شاراعا كەلگەن مەيماندارعا جاننات بايمۇحانوۆانىڭ اتالعان ارت-البومعا ەنگەن، وسىناۋ بەكزات ونەردەن سىر شەرتەتىن سۋرەتتەرىنەن قۇرالعان كورمە ۇسىنىلدى.