سوڭعى جىلدارى تۇركى ەلدەرىنىڭ رۋحانيات سالاسىنداعى بايلانىستارى جاڭا دەڭگەيگە شىقتى. ونىڭ جارقىن ءبىر مىسالى، جۋىردا تۇركيا جازۋشىلار وداعىنىڭ باسقارما ءتوراعاسى، انكارا الەۋمەتتىك عىلىمدار ۋنيۆەرسيتەتىنىڭ رەكتورى، پروفەسسور، دوكتور مۇسا كازىم ارىجاننىڭ قازاقستانعا ارناي ساپارلاپ كەلۋى، - دەپ حابارلايدى Almaty-akshamy.
پروفەسسور، دوكتور مۇسا كازىم ارىجاننىڭ قازاقستانعا ساپارىنىڭ نەگىزگى ماقساتى دا رۋحانيات سالاسىنداعى بايلانىستاردى تەرەڭدەتۋ. وسى ورايدا 16 قىركۇيەكتە مۇسا كازىم ارىجان مىرزا تۇركسوي قازاقستان جازۋشىلار قاۋىمداستىعىنىڭ پرەزيدەنتى ۇلىقبەك ەسداۋلەتپەن كەزدەستى. قوس تاراپ سەزاي كاراكوچ، راسيم وزدەنورەن، دجەميل مەريچ سياقتى اتاقتى تۇرىك جازۋشىلارىنىڭ ەڭبەكتەرى قازاق تىلىنە اۋدارىلاتىنى تۋرالى ۋاعدالاستى. سونداي-اق، تۇرىك جازۋشىسى مەحمەت اكيف ەرسويدىڭ تۋعانىنا 150 جىل تولۋىنا وراي جوسپارلانعان مەرەكەلىك شارا تۋرالى پىكىر الماستى.
سونىمەن قاتار ادەبيەت پەن مادەنيەت سالاسىنداعى، سونداي-اق رۋحاني-اعارتۋشىلىق جانە جالپى گۋمانيتارلىق ماسەلەلەردەگى ارىپتەستىك پەن ءوزارا ىنتىماقتاستىق تۋرالى مەموراندۋمعا قازاقستان جازۋشىلار وداعىنىڭ ءتوراعاسى مەرەكە قۇلكەنوۆ پەن تۇركيا جازۋشىلار وداعىنىڭ ءتوراعاسى مۇسا كازىم ارىجان قول قويدى.
ءبىلىم بەرۋ جانە عىلىم سالاسى دا نازاردان تىس قالمادى. ءبىلىم بەرۋ مەن عىلىمي-زەرتتەۋ سالالارىندا ىنتىماقتاستىق تۋرالى مەموراندۋمعا انكارا الەۋمەتتىك عىلىمدار ۋنيۆەرسيتەتى رەكتورى مۇسا كازىم ارىجان مەن ق ر ۇلتتىق عىلىم اكادەمياسىنىڭ پرەزيدەنتى كۇنسۇلۋ زاكاريا اراسىندا ءبىلىم بەرۋ مەن عىلىمي-زەرتتەۋ سالالارىندا ىنتىماقتاستىق تۋرالى مەموراندۋمعا قول قويىلدى. سونداي-اق، ەلىمىزدىڭ جەتەكشى ۋنيۆەرسيتەتتەرى ءال-فارابي ات. قازۇۋ مەن الماتى بيزنەس ۋنيۆەرسيتەتتەرىمەن ءبىلىم بەرۋ سالاسىندا ىنتىماقتاستىق ورناتۋ تۋرالى مەموراندۋمدارعا قول قويىلدى.
مۇسا كازىم ارىجان ەۋرازيا عىلىمي-زەرتتەۋ ينستيتۋتىندا «ءداستۇر مەن زاماناۋي ۇدەرىستەر اراسىنداعى تۇركى جاستارى مەن بولاشاعى» تاقىرىبىندا سەمينارى ءوتتى. سەمينارعا ينستيتۋت باسشىسى دوكتور سۋات بەيلۋر مىرزا، «Alatau Aqparat» ج ش س باس ديرەكتورى ەرجان قالىمباي ۇلى جانە ينستيتۋتتىڭ عىلىمي قىزمەتكەرلەرى قاتىستى. شارا سوڭىندا انكارا الەۋمەتتىك عىلىمدار ۋنيۆەرسيتەتى مەن ەۋرازيا عىلىمي-زەرتتەۋ ينستيتۋتى اراسىندا بايلانىس ورناتۋ تۋرالى مەموراندۋمعا قول قويىلدى.