وتباسىلىق مەرەكەلەردى 10 ادامعا دەيىن شەكتەۋ ەنگىزىلدى
بەيجىڭ بيلىگى قىتايداعى جاڭا جىل مەن قىسقى وليمپيادا ويىندارى قارساڭىندا COVID-19-دىڭ الدىن الۋ جانە باقىلاۋ شارالارىن كۇشەيتۋدە. بۇل تۋرالى جۇما كۇنى بەيجىڭ قالاسى ۇكىمەتىنىڭ رەسمي وكىلى سيۋي حەسزيان ءمالىم ەتتى، دەپ حابارلادى قازاقپارات.
سيۋي حەسزياننىڭ ايتۋىنشا، پەكين اكىمشىلىگى COVID-19-دىڭ الدىن الۋ جانە باقىلاۋ شارالارىن قايتا قاراپ، تۇرعىنداردى الداعى مەرەكەلەرى – جاڭا جىل مەن كوكتەم مەرەكەسىن قحر استاناسىندا وتكىزۋگە شاقىردى. جەرگىلىكتى بيلىك كاسىپورىندارعا الداعى مەرەكەلەر كەزىندە ءوز قىزمەتكەرلەرىنە يكەمدى جۇمىس كەستەسىن ەنگىزۋدى ۇسىندى. وتباسىلىق مەرەكەلەردى 10 ادامعا دەيىن شەكتەۋ، سونداي-اق بەيجىڭدە كونفەرەنسيالار مەن وقۋ ءىس-شارالارىنىڭ وتكىزىلۋىن قاتاڭ باقىلاۋ تۋرالى جاريالاندى. ساياباقتار، مۇراجايلار، كىتاپحانالار، كينوتەاترلار جانە باسقا دا قوعامدىق ورىنداردىڭ تولۋى 75% - دان اسپاۋى ءتيىس.
ەستەرىڭىزگە سالا كەتەيىك، وتكەن بەيسەنبىدە 13 ميلليون حالقى بار سيان قالاسىندا قىسقى وليمپيادا ويىندارىنىڭ اشىلۋىنا 40 كۇن قالعاندا لوكداۋن ەنگىزىلدى. 9 جەلتوقساننان باستاپ قىتايدىڭ وسى مەگاپوليسىندە كوروناۆيرۋس ينفەكسياسىنىڭ 200-دەن استام جاعدايى انىقتالدى.