ادامدارعا سىرتقا شىقپاۋعا كەڭەس بەرىلدى
جۇڭگو استاناسىندا كوروناۆيرۋس ىندەتى باسىلعان جوق. ءۇش اپتادا 800-دەن استام ادام كوۆيد جۇقتىرعان، دەپ حابارلايدى Almaty-akshamy.kz «حابار24»-كە سىلتەمە جاساپ.
بەيجىڭنىڭ ءبىر اۋدانى تولىق وقشاۋلانعان، ادامدارعا سىرتقا شىقپاۋعا كەڭەس بەرىلدى. شاھاردا ويىن-ساۋىق ورىندارى مەن كينوتەاترلار جابىق، مەيرامحانالار تەك تاپسىرىسپەن جۇمىس ىستەيدى، مەكتەپتەر مەن بالاباقشالار ونلاينعا اۋىستى.
پتر سىناقتان ءوتۋ جۇڭگو استاناسىنىڭ كوپتەگەن تۇرعىندارى ءۇشىن كۇندەلىكتى ادەتكە اينالدى. ءساۋىر ايىنىڭ سوڭىنان باستاپ بەيجىڭنىڭ كەي اۋداندارىندا كەم دەگەندە 10 مارتە جاپپاي تەستىلەۋ جۇرگىزىلدى.
ءبىز پتر سكرينينگتىڭ كوپتەگەن كەزەڭدەرىن وتكىزدىك. جۇرتتىڭ شارشاعانىن تۇسىنەمىز. قالا تۇرعىندارىنىڭ باسىم بولىگى ىندەتكە قارسى شارالاردى سانالى تۇردە ساقتاپ، ءوزارا قولداۋ كورسەتتى. بۇل ءۇشىن العىس ايتامىز. بولاشاقتا پتر تەستكە قاتىسۋعا تۇسىنىستىكپەن قارايدى دەپ ۇمىتتەنەمىز، – دەدى دەنساۋلىق ساقتاۋ كوميتەتى باسشىسىنىڭ ورىنباسارى لي ان.
شاھاردا مەكتەپتەر مەن بالاباقشالار ونلاين جۇمىس ىستەپ جاتىر. بارلىق ويىن-ساۋىق ورتالىقتارى، كينوتەاترلار، تەاترلار، فيتنەس ورتالىقتارى مەن ساياباقتار جابىق. ىندەتتىڭ ورشۋىنە بايلانىستى قالادا كولىكتەر ايتارلىقتاي ازايىپ، ساۋدا ورتالىقتارىندا ادام سانى سيرەگەن. تەك سۋپەرماركەتتەر مەن سىرتقا تاماق ساتاتىن مەيرامحانالار جۇمىس ىستەپ جاتىر. شەكتەۋ شارالارىنا بايلانىستى كاسىپورىندار شىعىنعا باتقان.
ءبىز قاتتى قينالدىق. ءقازىر تاماعىمىزدى تەك سىرتقا ساتىپ ءجۇرمىز، كۇنىنە تۇسەتىن تاپسىرىس سانى از. مەيرامحانادا تاماقتانۋعا تىيىم سالىندى، – دەدى مەيرامحانا يەسى چجاو حۋنمەي.
جەرگىلىكتى بيلىك كەيبىر كاسىپورىندار ءۇشىن الەۋمەتتىك تولەمدەردى كەيىنگە قالدىرۋ تۋرالى حابارلادى. شاعىن بيزنەسكە دە جالداۋ اقىسى مەن سالىق بويىنشا جەڭىلدىكتەر قاراستىرىلعان. الايدا بەيجىڭدەگى ءومىر قاشان قالپىنا كەلەتىنى ءازىر بەلگىسىز. ونىڭ ۇستىنە قالانىڭ ءبىر اۋدانى قالعان اۋدانداردان وقشاۋلانىپ قالدى. قالالىق كولىك جۇمىسى جارتىلاي توقتاپ، مەترو ستانسيالارى جابىلدى.