ق ر مادەنيەت جانە سپورت مينيسترلىگىنىڭ تاپسىرىسى بويىنشا ۇلتتىق كينونى قولداۋ مەملەكەتتىك ورتالىعىنىڭ كومەگىمەن تۇسىرىلگەن رەجيسسەر-دەبيۋتانت اسحات كۋچينچيرەكوۆتىڭ «باۋىرىنا سالۋ» ءفيلمى يسپانياداعى 71ء-شى سان-سەباستيان حالىقارالىق كينوفەستيۆالىنىڭ “جاڭا رەجيسسەرلەر” بايقاۋ باعدارلاماسىنا ەندى، دەپ حابارلايدى Almaty-akshamy.kz.
«باسك ەلىنىڭ» بۇل فەستيۆالى «ا» كلاسىنداعى ەڭ كونە كينوفەستيۆالدەردىڭ ءبىرى جانە ەۋروپاداعى كانن، بەرلين، ۆەنەسيادان كەيىنگى ءتورتىنشى ماڭىزدى جانە يسپان تىلىندە سويلەيتىن الەمدەگى ەڭ ماڭىزدى فەستيۆال بولىپ سانالادى. فەستيۆال بۇكىل الەم بويىنشا كورنەكتى تالانتتاردى ىزدەۋمەن جانە جىل سايىن جاڭا ەسىمدەردى اشۋمەن تانىمال.
«باۋىرىنا سالۋ» كارتيناسى قازاقتىڭ بايىرعى ءداستۇرى بويىنشا اجەسىنىڭ تاربيەسىندەگى بالانىڭ ءومىرىن باياندايدى. اجەسى ومىردەن وزعاننان كەيىن ول اتا-اناسىنا ورالىپ، جاڭا ورتادا بەيتانىس ادامدارمەن قارىم-قاتىناس ورناتۋى كەرەك. ءفيلمنىڭ سەنارييىن جازعان اسحات كۋچينچيرەكوۆتىڭ ايتۋىنشا، بۇل كارتينا قازاق حالقىنىڭ سالت-داستۇرىنە دەگەن قۇرمەت.
«بۇل وتە جەكە وقيعا. مەن اجەمنىڭ قولىندا ءوستىم، ول مەنى ءوسىردى. ءبىراق بۇل جەردە ەڭ باستىسى - اتا-انامەن قارىم-قاتىناس. اجەسىمەن بىرگە وسكەن بالالاردىڭ ءبارى ەشقاشان اتا-اناسىن «اكە»، «انا» دەپ اتامايدى. نەلىكتەن؟ بالالار تاستاپ كەتكەنىنە رەنجيدى. ءفيلمنىڭ دراماسى سول، ەسكى وتباسىنان ايىرىلعان كەيىپكەر ءالى دە جاڭاسىن تابا الادى»، - دەيدى رەجيسسەر.
«اسحات كۋچينچيرەكوا وتباسىنداعى، ەڭ الدىمەن، اكە مەن بالا اراسىنداعى قارىم-قاتىناستىڭ كۇشتى وقيعاسىن وتە تالانتتى تۇسىرگەن، «باۋىرىنا سالۋ» ءداستۇرى ورتالىق ازيا ايماعىندا بولعانىنا قاراماستان، بۇكىل الەم بويىنشپ تۇسىنىكتى جانە كورەرمەنگە جاقىن بولىپ شىقتى. مۇنىڭ جارقىن دالەلى - سان-سەباستيان فەستيۆالىنە قاتىسۋ»، - دەيدى ءفيلمنىڭ پروديۋسەرى اننا كاچكو.
كوپشىلىككە سەرگەي دۆورسيەۆويدىڭ «تيۋلپان» فيلمىندەگى باستى ءرولى ارقىلى تانىلعان اسحات كۋچينچيرەكوۆ (2008 جىلى كانن كينوفەستيۆالىندە “ەرەكشە كوزقاراس” بايقاۋىنىڭ باس جۇلدەسىنىڭ يەگەرى) ءوزىنىڭ دەبيۋتتىك ءفيلمىن ءۇش جىل بويى جاسادى. ءتۇسىرىلىم الماتى وبلىسىنداعى قۇيعان جانە تۇيىق اۋىلدارىندا جۇرگىزىلدى. قويۋشى-وپەراتور جاناربەك ەلەۋبەك. باستى ءرولدى جاڭا اكتەر ەرسۇلتان ەرمانوۆ سومدادى.
71ء-شى سان-سەباستيان حالىقارالىق كينوفەستيۆالى 2023 جىلدىڭ 22-30 قىركۇيەگىندە وتەدى. فەستيۆالدە سونىمەن قاتار بۇكىل الەم بويىنشا فيلمدەردى ودان ءارى ىلگەرىلەتۋ جانە ساتۋ ءۇشىن كينو ماماندارىن بىرىكتىرەتىن جىل سايىنعى ءىرى كينوبيزنەس الاڭى وتكىزىلەدى.