الماتى قالاسى توتەنشە جاعدايلار دەپارتامەنتىنىڭ اقپاراتىنا سايكەس قالا جانە تاۋ بوكتەرىندەگى اۋدانداردا بارلىعى 44 سۋ ايدىنى بار، ولاردىڭ 12ء-سى شومىلۋ ماۋسىمى كەزىندە حالىققا ءقاۋىپ توندىرەدى. سۋ ايدىندارىنداعى قاۋىپسىزدىككە بايلانىستى مالىمەتتەرمەن وڭىرلىك كوممۋنيكاسيالار قىزمەتىنىڭ الاڭىندا تجد ازاماتتىق قورعانىس باسقارماسىنىڭ اعا وفيسەرى، كاپيتان سۇلتانوۆ ەسبول ميراس ۇلى ءبولىستى، دەپ حابارلايدى almaty-akshamy.kz
دەپارتامەنتپەن تۇراقتى نەگىزدە جۇرگىزىلەتىن پروفيلاكتيكالىق جۇمىستار ناتيجەسىندە، بۇگىنگى تاڭدا قالا سۋ ايدىندارىندا ادام ولىمىنە جول بەرىلمەگەن. جىل باسىنان بەرى رەسپۋبليكا بويىنشا 141 ادام سۋعا باتىپ كەتتى، ونىڭ 39-ى بالالار.
"سۋداعى جازاتايىم وقيعالاردىڭ الدىن الۋ ماقساتىندا دەپارتامەنت پوليسيا قىزمەتكەرلەرىن، رەسپۋبليكالىق جەدەل-قۇتقارۋ جاساعى قۇتقارۋشىلارىن، سونداي-اق ەرىكتىلەرمەن بىرلەسىپ، رەيدتىك ءىس-شارالار جۇرگىزۋدە. بۇگىنگى تاڭدا 390-نان استام رەيد جۇرگىزىلىپ، 3800-دەن استام جادىناما تاراتىلدى"، - دەدى سپيكەر.
رەيدتەردى جۇرگىزۋ بارىسىندا سۋعا تۇسۋگە تىيىم سالىنعان ورىنداردا جاعدايدى باقىلايتىن ەسكەرتۋ ماشينالارى مەن ۇشقىش دروندار پايدالانىلادى.
"جىل باسىنان بەرى جالپى سۋ پايدالانۋ ەرەجەلەرىن بۇزعانى ءۇشىن ەسكەرتۋ تۇرىندە 18 بۇزۋشى اكىمشىلىك جاۋاپكەرشىلىككە تارتىلدى. الكوگولدى ىشىمدىكتەردى ىشكەنى نەمەسە قوعامدىق ورىنداردا ماس كۇيىندە پايدا بولعانى ءۇشىن ءۇش ءتارتىپ بۇزۋشى اكىمشىلىك جاۋاپكەرشىلىككە تارتىلدى. سۋ ايدىندارىندا قاۋىپسىزدىك ەرەجەلەرىن بۇزعانى ءۇشىن جالپى سوماسى 150 مىڭ تەڭگەگە التى ادام جاۋاپكەرشىلىككە تارتىلدى"، - دەپ اتاپ ءوتتى ە. سۇلتانوۆ.
بريفينگتە ءسوز العان ازاماتتىق قورعانىس وفيسەرى شومىلۋ ماۋسىمىندا قالا تۇرعىندارىن سۋدا ءقاۋىپسىز ءجۇرىس-تۇرىس ەرەجەلەرىن ساقتاۋعا، سونداي-اق سۋ ايدىندارى جانىندا بالالاردى نازاردان تىس قالدىرماۋعا شاقىردى.
جازاتايىم وقيعالاردى بولدىرماۋ ءۇشىن، تجد كەلەسى ەرەجەلەردى ساقتاۋعا شاقىرادى:
- بالالاردى سۋدىڭ جانىندا قاراۋسىز قالدىرماۋ؛
- تەك جابدىقتالعان جاعاجايلاردا جانە رەسمي رۇقساتى مەن قۇتقارۋ قىزمەتى بار شومىلۋعا ارنالعان باسقا جەرلەردە شومىلۋ؛
- جۇزە المايتىن جاعدايدا، بەلدەن جوعارى سۋعا تۇسپەۋ؛
- شومىلۋ كەزىندە ءبىر-بىرىڭىزدى نازاردان قالدىرماۋ؛
- قالقىمالار، قورشاۋ بەلگىلەرى مەن جاعادان الىس جۇزبەۋ؛
- قايىقتاردان، كوپىرلەردەن جانە ايلاقتاردان سۋعا سەكىرمەۋ؛
- تۇندە سۋدا شومىلماۋ.