بۇل قىزمەتتەن ول ءوز ەركىمەن كەتكەنىن مالىمدەدى.
Nur Otan پارتياسى ءتوراعاسىنىڭ ءبىرىنشى ورىنباسارى بولعان باۋىرجان بايبەك ءوز ەركىمەن قىزمەتتەن كەتتى. بۇل تۋرالى باۋىرجان بايبەك Facebook پاراقشاسىندا جازدى، دەپ حابارلايدى Almaty-akshamy.kz.
باۋىرجان قىدىرعالي ۇلى پارتيانىڭ الدىندا جاڭا مىندەتتەردىڭ تۇرعانىن، وسى كۇنگە دەيىن اۋقىمدى جۇمىس اتقارىلعانىن ايتتى. "ال مىندەتتەردى جۇزەگە اسىرۋ ءۇشىن پارتيادا قاجەتتىنىڭ ءبارى – ادامدار، تاجىريبە، رەسۋرستار جانە ينفراقۇرىلىم بار"، - دەدى ول.
«سەزدە ەل پرەزيدەنتى، Nur Otan»پارتياسىنىڭ جاڭادان سايلانعان ءتوراعاسى قاسىم-جومارت كەمەل ۇلى توقايەۆ پارتيانى رەفورمالاۋ، جۇمىستىڭ ادىستەرى مەن مازمۇنىن جاڭارتۋ، پارتيالىق باقىلاۋدى كۇشەيتۋ، قوعامدىق قابىلداۋلاردىڭ تيىمدىلىگىن ارتتىرۋ، كادرلىق الەۋەتتى نىعايتۋ، سونداي-اق جاڭا فورماسياداعى ادامداردى تارتۋ جونىندە ناقتى مىندەتتەر قويدى»، - دەپ جازدى ول Facebook پاراقشاسىندا.
وسىلايشا باۋىرجان بايبەك پارتيا باسشىلىعى قىزمەتىنەن ءوز ەركىمەن كەتۋ تۋرالى ءوتىنىشىن جازعانىن، ءتوراعا ونى ماقۇلداعانىن ايتتى.
«Nur Otan الدىنا جاڭا كوزقاراستار مەن تاسىلدەردى تالاپ ەتەتىن مۇلدە جاڭا مىندەتتەر قويىلدى. سوندىقتان مەن پارتيا ءتوراعاسى قاسىم-جومارت كەمەل ۇلى توقايەۆقا اتقارىپ وتىرعان قىزمەتىمنەن بوساتۋ تۋرالى ءتيىستى ءوتىنىشىمدى بەردىم. بۇگىن مەنىڭ ءوتىنىشىم قاناعاتتاندىرىلدى. مەن مەملەكەتتىك جانە پارتيالىق قىزمەتتە 20 جىلدان استام ەڭبەك ەتتىم: ەكى رەت، جالپى العاندا 6 جىلعا جۋىق Nur Otan پارتياسى ءتوراعاسىنىڭ ءبىرىنشى ورىنباسارى، 3 جىلعا جۋىق پرەزيدەنت اكىمشىلىگى باسشىسىنىڭ ورىنباسارى لاۋازىمدارىندا، 4 جىل الماتى قالاسىنىڭ اكىمى بولىپ جۇمىس ىستەدىم. قانداي قىزمەت اتقارسام دا، قاي سالاعا جاۋاپتى بولسام دا، مەن ءارقاشان وتانىمىزدىڭ تاۋەلسىزدىگىن نىعايتۋعا، قوعامدا ىشكى ساياسي تۇراقتىلىق پەن كەلىسىمدى قامتاماسىز ەتۋگە، ەل ازاماتتارىنىڭ ءال-اۋقاتىن ارتتىرۋعا ءوزىمنىڭ ۇلەسىمدى قوسۋعا تىرىستىم. ءوز جۇمىسىمدا اشىقتىق جانە جاۋاپكەرشىلىك قاعيدالارىن باسشىلىققا الدىم. ار-نامىس، سوزگە بەرىكتىك جانە ىسكە ادالدىق دەگەن ۇعىمدار مەن ءۇشىن ءارقاشان ءبىرىنشى ورىندا بولدى»، - دەپ جازدى باۋىرجان بايبەك.
ايتا كەتسەك، بۇدان بۇرىن پرەزيدەنتتىڭ باسپا ءسوز حاتشىسى بەرىك ءۋالي Facebook پاراقشاسىندا مەملەكەت باسشىسى قاسىم-جومارت توقايەۆ باۋىرجان بايبەككە Nur Otan پارتياسى ءتوراعاسىنىڭ ءبىرىنشى ورىنباسارى لاۋازىمىنداعى كوپ جىلعى جۇمىسى ءۇشىن العىس ايتتى، دەپ حابارلاعان بولاتىن.