وتا 2،5 ساعاتقا سوزىلدى.
ورتالىق قالالىق كلينيكالىق اۋرۋحانا دارىگەرى، ورتوپەد قانات تاۋەكەلوۆ قىزىلوردادان كەلگەن 34 جاستاعى تۇرعىننىڭ اياعىنا كۇردەلى وپەراسيا جاسادى. بىرەگەي وتا مىندەتتى الەۋمەتتىك مەديسينالىق ساقتاندىرۋ پاكەتى شەڭبەرىندە جاسالدى، دەپ حابارلايدى Almaty-akshamy.kz ورتالىق كلينيكالىق اۋرۋحانانىڭ باسپا ءسوز قىزمەتىنە سىلتەمە جاساپ.
وپەراسيا ناتيجەسىندە پاسيەنتتىڭ سول اياعى 5 سانتيمەترگە ۇزارتىلىپ، اياقتارى تەڭەستىرىلدى.
دارىگەرلەر پاسيەنتكە «جامباس سۇيەگىنىڭ ءتۋابىتتى كەمىستىگى. 3-تيپتەگى CROWE» دياگنوزىن قويعان. ورتوپەد ماماننىڭ ايتۋىنشا، جىگىتتىڭ وڭ اياعى سول اياعىنان 6 سم ۇزىن بولعان. سوندىقتان ول بالا كۇنىنەن بالداققا سۇيەنىپ جۇرگەن.
«ءبىز ەندوپروتەزدىڭ كومەگىمەن سول جاق جامباس سۇيەگىن تولىق اۋىستىرىپ، سول جاق جامباستى اناتوميالىق جاعىنان ۇزارتتىق»، - دەيدى كلينيكانىڭ ورتوپەديا ءبولىمى مەڭگەرۋشىسى قانات تاۋەكەلوۆ.
دارىگەردىڭ سوزىنە سۇيەنسەك، جامباس بۋىنىن ەندوپروتەزدەۋ كەزىندە جامباستىڭ باسى، موينى مەن ۇرشىق تولىعىمەن جاساندى پروتەزگە اۋىستىرىلادى.
«مۇنداي جاعدايدا جامباس سۇيەگىنىڭ وستەوتومياسى دەپ اتالاتىن ءتاسىل جاقسى ناتيجە بەرەدى. ول اياقتاعى اقاۋدى تۇزەتىپ قانا قويماي، اياقتىڭ قىزمەتىن دە ايتارلىقتاي قالپىنا كەلتىرۋگە كومەكتەسەدى. وتا 2،5 ساعاتقا سوزىلدى»، - دەپ اتاپ ءوتتى ق.تاۋەكەلوۆ.
«ءمامس پاكەتى ارقىلى وسىنداي كۇردەلى وپەراسيالاردى جاساتۋعا بولادى. ساقتاندىرىلعان تۇرعىندار باعاسى قىمبات بولىپ كەلەتىن، جوعارى تەحنولوگيالاردىڭ كومەگىمەن جاسالاتىن قىزمەت تۇرلەرىن قاجەتىنشە پايدالانا الادى»، - دەيدى مسق الماتى فيليالى ديرەكتورى تىلەۋحان ابىلدايەۆ.
