باتىس قازاقستاندا دالالىق جەر ورتەنىپ جاتىر

جالىنمەن ارپالىس

باتىس قازاقستان وبلىسىندا دالالىق جەر وتقا وراندى، دەپ حابارلايدى Almaty-akshamy.kz قازاقپارات-قا سىلتەمە جاساپ.
بقو تج دەپارتامەنتىنىڭ باسپا ءسوز قىزمەتىنەن ءمالىم ەتكەنىندەي، وقيعا 5 قىركۇيەك كۇنى ساعات 09.40-تا سىرىم اۋدانى جوسالى اۋىلدىق وكرۋگىندە تىركەلدى.

«قوڭىر اۋىلىنان 15 شاقىرىم جەردە شامامەن 800 گەكتار القاپتا قۇرعاق ءشوپ ورتەندى. «ءتىلسىز جاۋدى» اۋىزدىقتاۋعا باستاپقىدا №18 ءورت ءسوندىرۋ ءبولىمى مەن توتەنشە جاعداي ءبولىمى (10 قىزمەتكەر، 1 تەحنيكا) جانە ەرىكتى ءورت سوندىرۋشىلەر قۇرىلىمى (35 ادام، 12 تەحنيكا) جۇمىلدىرىلدى. سونىمەن قاتار شىڭعىرلاۋ اۋدانى مەن ورال قالاسىنان كومەك كەلىپ جەتتى. ءورتتى سوندىرۋگە جىلدامدىعى سەكۋندىنا 15 مەترگە دەيىن جەتكەن جەل كەدەرگى بولۋدا. قازىرگى كەزدە تجد (33 قىزمەتكەر، 6 تەحنيكا)، «ورال ءورت ءسوندىرۋشى» ج ش س (5 ادام، 1 تەحنيكا)، ەرىكتى ءورت سوندىرۋشىلەر قۇرىلىمى (50 ادام، 16 تەحنيكا)، ورمان شارۋاشىلىعى (1 ادام، 1 تەحنيكا) كۇشتەرى جالىنمەن ارپالىسۋدا»، دەپ حابارلادى ۆەدومستۆودان.

ەسكە سالا كەتەيىك، بۇدان بۇرىن ورالدا ورتەنگەن پوليگوندا كومىرتەگى توتىعى شەكتى مولشەردەن اسىپ تۇسكەن.